Ограничени дискусиите за законот за бранители, Села ќе го пали Собранието



Седницата на Комисија за труд и социјала е прекината и ќе продолжи в понеделник, до кога се очекува на албански јазик да бидат преведени и доставени сите 15.571 амандмани

Собраниската Комисија за труд и социјална политика денеска ги изгласа ограничувањата на времетраењето на обраќањата на дискусиите за амандаманите поднесени за Предлог-законот за бранители. Седницата е прекината и ќе продолжи в понеделник, до кога се очекува на албански јазик да бидат преведени и доставени сите 15.571 амандман.

Партиите од македо��скиот блок - СДСМ и ВМРО-ДПМНЕ, како етничко мнозинство во Комисијата за труд и социјална политика, лесно го изгласаа ограничувањето на дискусиите за Законот за бранители на 10 минути, како и на репликите и контрарепликите на три минути. Но, нејасно е кој и како ќе го мери времето, бидејќи во собраниските сали каде што расправаат работните тела нема мерач на времето како на пленарните седници.

„Со едно гласање во оваа држава може да се направи се'. Ајде да гласаме на Веле Георгиевски да му изградиме куќа. Или да гласаме сите овие новинари што седат во галеријата да ги ставиме во затвор. Или ајде да гласаме и да прогласиме вонредна состојба. Навистина не ми е јасно што се случува во ова Собрание“, порача од говорницата пратеникот на ДПА, Зијадин Села.

Пратеничката на ДУИ Ермира Мехмети Деваја, која се обиде со долги процедурални забелешки да ја блокира Комисијата (по што следеше ново гласање и нивно ограничување), предупреди дека општествената дебата, во моментите кога очекуваме датум за преговори со ЕУ, се сведува на етнички блокови.

„Овие предлози беа изгласани етнички, гласаше само едната страна. Ни се случува суспензија на демократијата. Оваа дебата ќе биде опасна последица по перспективите на државата. Вие направивте преседан. Мислите лесно беше Фатмир Бесими да клекне пред борците од македонската страна“, ги праша Деваја, пратениците од ВМРО-ДПМНЕ.

Објаснувајќи и на пратеничката група на ДУИ како вистински може да се спречи донесувањето на законот за бранители, пратеникот на ДПА Зијадин Села, инаку познат по радикални ставови, уште еднаш излета од шините на демократијата и парламентарната култура.

„Знаете како се блокира Законот? Кога по последниот амандман ќе го запалиме Собранието“, се загуби Села во времето, за кое вчера се водеше тешка „бранителска“ битка.

Бидејќи не сакаше да ја напушти говорницата, претседателката на Комисијата за труд и социјална политика, Цветанка Иванова, ја прекина седницата, по што Села извади запалка од џепот за да и' даде креативен шмек на својата теза, небаре се наоѓа на концерт на Металика.

На седницата, на барање на Иванова, беше повикан и генералниот секретар на Собранието Жарко Денковски, кој информираше дека бил известен од раководителот на собраниската служба за превод дека до петок, најдоцна до сабота, сите 15.571 амандман ќе бидат преведени. По ова продолжението на седницата е закажано за понеделник во 11 часот.