07.11.2012, 15:31 Од декемврискиот самит на ЕУ ќе зависи развојот на земјата
Лидерот на СДСМ, Бранко Црвенковски денеска се сретна со известувачот на ЕП за Македонија, Ричард Ховит
Претседателот на Социјалдемократскиот сојуз на Македонија Бранко Црвенковски денеска имаше средба со известувачот на Европскиот парламент за Република Македонија Ричард Ховит, соопшти прес-службата на партијата.
На средбата меѓу другото, главен акцент е ставен на последниот Извештај на Европската комисија за напредокот на Република Македонија, неодамнешниот „Меморандум за разбирање“ инициран од страна на Атина и сигналите кои до нив ги испраќа македонската Влада преку својот одговор, како и за очекувањата од декемврискиот самит на ЕУ.
Црвенковски истакна дека доколку во декември Македонија добие датум за преговори со ЕУ, позитивниот извештај ќе ја добие својата вистинска смисла, а во спротивно Македонија ќе се најде во веќе видена ситуација.
Известувачот на ЕП за Република Македонија, Ховит ги повтори своите заложби и потсети за личните напори вложени во процесот на изнаоѓање на компромисни решенија, со цел решавање на спорот со соседна Грција и со тоа конечно почнување на пристапните преговори на Македонија со Европската Унија.
На крајот на средбата двајцата соговорници заклучија дека исходот од Самитот на ЕУ кој ќе се одржи во декември е од исклучително значење за иднината на Македонија, гледано во најширока смисла. Дека од него ќе зависат движењата, развитокот и позиционирањето на земјата како во рамки на меѓународните односи, така уште повеќе и на внатрешен, а пред се меѓуетнички и политички план, се наведува во соопштението од Центарот за комуникација на СДСМ.
|
