06.11.2012, 23:53 Озил го спаси Реал, Сити пред елиминација
Со погодокот од слободен удар во 89. минута натурализираниот Германец им донесе реми (2:2) на „кралевите“ на домашен терен во дуелот со Борусија Дортмунд
Во дербито на вечерта во Лигата на шампионите во рамките на групата Д, Реал Мадрид и Борусија Дортмунд одиграа 2:2.
„Кралевите“ одиграа под своите можности, па едвај стигнаа до реми против Борусија. Гостите два пати доаѓаа во водство преку Ројс и Арбела си постигна авто гол, но тимот на Жозе Мурињо се спаси благодарение на погодокот на Озил во 89. минута , а претходно прецизен беше и Пепе.
Во истата група, Манчестер Сити се наоѓа на работ на елиминација од Лигата на шампионите откако англискиот првак и во својот четврти натпревар не успеа да стигне до првата победа во рамките од групата Д.
„Граѓаните“ одиграа 2:2 во контроверзен натпревар против Ајакс. Холанѓаните одлично го почнаа мечот и рано стигнаа до предност од 0:2 со двата гола на Де Јонг по заспаноста на дефанзивците на „Граѓаните“. Сепак, Јаја Туре постигна погодок за да ја ублажи негативата во првиот дел, пред Агуеро да го постигне израмнувачкиот погодок.
Малага по само четири кола избори пласман во нокаут фазата, откако вечерва на Сан Сиро одигра 1:1 против Милан. Елисеу ги доведе Шпанците во водство во 40. минута, а бод на миланезите им донесе Бразилецот Пато во 73. минута. Во истата група Ц, Андерлехт со голот на Мбокани во 17. минута минимално го совлада Зенит со 1:0.
Арсенал прокоцка предност од 0:2 во Гелзенкирхен, овозможувајќи им на домаќините да се вратат во мечот и со погодоците на Хунтелар и Фарфан да освојат бод со кој што Шалке се задржа на првото место на табелата.
ПСЖ ја продлабочи европската мизерија на Динамо Загреб декласирајќи го хрватскиот шампион со 4:0. Златан Ибрахимовиќ имаше четири асистенции на овој меч, а головите за „светците“ ги постигнаа Алекс, Матуиди, Менез и Ора. Пласман во следната фаза обезбеди и Порто, кој во истата група одигра без голови на гостувањето кај Динамо Киев.
РЕЗУЛТАТИ ОД 4.КОЛО:
ГРУПА А: ПСЖ - Динамо Загреб 4:0 (1:0), Динамо Киев - Порто 0:0. ТАБЕЛА: Порто 10, ПСЖ 9, Динамо Киев 4, Динамо Загреб 0.
ГРУПА Б: Олимпијакос - Монпелје 3:1 (1:0), Шалке - Арсенал 2:2 (1:2). ТАБЕЛА: Шалке 8, Арсенал 7, Олимпијакос 6, Монпеље 1.
ГРУПА Ц: Милан - Малага 1:1 (0:1), Андерлехт - Зенит 1:0 (1:0). ТАБЕЛА: Малага 10, Милан 5, Андерлехт 4, Зенит 3.
ГРУПА Д: Реал Мадрид - Борусија Дортмунд 2:2 (1:2), Манчестер Сити - Ајакс 2:2 (1:2). ТАБЕЛА: Борусија 8, Реал 7, Ајакс 4, Манчестер Сити 2.
|
