01.11.2012, 14:29 Квери му ја уништи забавата на Ѓоковиќ
Србинот дојде на мастерсот во Париз со маска од Дарт Вејдер, лик од „Војна на ѕвездите“, а си замина со наведната глава
Новак Ѓоковиќ го уништи својот имиџ на ментална карпа откако доживеа неверојатен пораз од Сем Квери, во првото појавување на мастерс-турнирот во Париз. Вториот светски рекет го освои првиот сет со 6:0, водеше со 2:0 во вториот и на крај излезе како поразен со 7:6 во вториот и 6:4 во третиот сет.
„Одличен тенис во почетокот, но знаев дека денеска ќе имам проблем со континуитетот. Не беше судено по вториот сет. Почувствував дека паѓам психолошки и потоа се мачев во секој гем“, изјави Србинот, кој минатата недела се справуваше со стомачен вирус. Имаше најави дека тој можеби ќе се повлече од турнирот во Берси, затоа што неговиот татко Срѓан деновиве се наоѓа во болница во Белград, со проблеми на респираторните органи.
„Не би сакал да зборувам за тоа. Извинете, но тоа е приватно и би сакал да го зачувам такво. Некои работи се случија и имам многу мисли во главата, така што моментно ми треба одмор од неколку дена пред АТП-финалето во Лондон“, кажа отворено Ѓоковиќ, притоа потенцирајќи дека неговиот приватен живот не го зема како изговор за поразот.
Сем Квери не можеше да се соземе од среќа. Не затоа што се пласира во осминафиналето на последниот Мастерс во годината, туку затоа што дури во петтиот дуел го победи тенисерот кој ќе ја заврши 2012 на врвот.
„Ова е мојата најголема победа, се чувствувам прекрасно. Сервирав одлично. Кога имав негатива од 6:0 и 2:0 сакав само да освојам гем. Кога го направив тоа добив самодоверба“, објасни Американецот по мечот. Место за четврт-финале ќе бара преку Милош Раониќ од Канада, кој исто така по пресврт го елиминира домашниот миленик Жереми Шарди.
Дебаклот на Ѓоковиќ фрли сенка на преостанатите победи на фаворитите. Третиот носител Енди Мари го победи Пол Анри Матје со 7:5, 6:3, а четвртиот фаворит Давид Ферер беше убедлив со Гранолјерс-Пујол со 6:1, 6:3. Победи за осминафинале остварија и седмиот носител Дел Потро, осмиот Типсаревиќ, деветтиот Монако и 11. Алмагро. Разочарување доживеа 12. носител, Ришар Гаске, кој во три сета загуби од Јужноафриканецот Кевин Андерсон (7:6, 4:6, 6:1).
|
