Поглед

Колку пари, толку ракомет и обратно

Роберт Димитриевски

Пред почетокот на квалификациите за Европското првенство во Данска најмалку што и' требаше на машката ракометна репрезентација на Македонија е нарушена атмосфера поради неисполнети ветувања. За незадоволството кај репрезентативците јавно проговори капитенот Кирил Лазаров, иако во интерес на синоќешниот натпревар со Швајцарија деталите ги остави за подоцна, но јавна тајна е дека камен на сопнување повторно се парите. Се зборува за сума од околу сто илјади евра што Ракометната федерација на Македонија им ги должи на играчите за премии за петтото место на ЕП во Србија, за пласманот на СП во Шпанија и за дневници и патни трошоци. Од РФМ, пак, велат дека не бегаат од наградата за успехот во мундијалскиот бараж со Австрија, дека за историскиот пласман на еврошампионатот биле соодветно наградени од државата и оти Федерацијата одвај составува крај со крај во услови на економска криза.

Резултат од последниот курцшлус на релација репрезентативци - РФМ е тоа што првите се незадоволни, а вторите изненадени и навредени. Најновата драмолетка во меѓусебните односи е се' само не неочекувана, бидејќи е видена повеќе пати во минатото. Таа е доказ дека проблем има, дека тој тлее, се провлекува и одвреме-навреме еруптира.

А се' може да се реши со договорно регулирање на односите меѓу непосредните производители на теренот (ракометарите) и, условно речено, работодавците (Федерацијата). Нека се дефинира веќе еднаш што претставува успех за македонската репрезентација и како тој ќе се вреднува финансиски, нека се стави тоа на хартија и нека го потпишат двете страни. Кој нема да го исполни својот дел од обврските, нека му го отстапи местото на некој друг. Чиста работа.

Одамна веќе никој не се занимава сериозно со спорт од ентузијазам и не ги брани боите на својата земја исклучиво од патриотизам, туку и од професионални побуди. Настапите, посебно на големите натпреварувања, носат финансиски бенефит од реклами, спонзорства, ТВ-права, вносни клупски договори. Колку и да се гледа сентиментално на претставувањето на татковината, денес и тоа е еден вид бизнис, во кој актери се и репрезентативците и Федерацијата, па ред е рамномерно да го делат колачот, но и да го понесат својот дел од одговорноста во случај на неуспех.