ДУИ: Ист третман за сите од 2001

Албанскиот партнер во Владата е цврсто решен да го блокира законот за бранители што го предложи ВМРО-ДПМНЕ

Татјана Поповска

Македонија има потреба од закон кој ќе го третира прашањето на припадниците на безбедносните сили, но тој закон треба да биде сеопфатен и да ги исполнува потребите на сите учесници во конфликтот од 2001 година. Ова денеска го препорача пратеничката од ДУИ, Ермира Мехмети-Деваја, која во име на партијата на Али Ахмети повтори дека нема да дозволат во Собранието да биде усвоен законот за бранители, кој го оцени како контроверзен и се заканува да го наруши принципот на соживот предводен во Рамковниот договор. Прашањето за потребата од ваков закон ДУИ го реафирмира во исто време кога аналитичарот Сашо Клековски во интервју за порталот „Прес 24“ ја нагласува потребата од усвојување на закон за цивилни жртви, со кој ќе се реши прашањето на припадниците на ОНА, на цивилните жртви и на раселените лица.

Мехмети-Деваја оценува дека мора да се реши прашањето на припадниците на ОНА, повикувајќи се на сугестијата од Европската комисија во Извештајот за напредокот на Македонија, каде што е наведено дека „владините партнери треба да најдат решение за жртвите од конфликтот во 2001 година“.

„Ние се залагаме да се решат проблемите, а не да го продлабочуваме јазот на поделби меѓу Албанците и Македонците, со контроверзен и едностран закон. Ова е време за помирување, не за раздор, за обединување, а не за поделби, за разбирање меѓу етничките заедници, а не на разединување. ДУИ ќе продолжи да се спротивставува на донесувањето на овој закон, со сите институционални механизми предвидени во Деловникот и Законот за Собранието. Нашата работа е принципиелна, не е уценувачка“.

Мехмети-Деваја е децидна дека за ова прашање не може да има договор меѓу владините партнери ВМРО-ДПМНЕ и ДУИ, се' додека се наметнува еднострано решение кое некого исклучува и ја поларизира атмосферата и политичкиот амбиент во државата. Вели дека на дневна основа владините партнери имаат комуникација, но за ова прашање разликите остануваат.

На прашањето како може за нив да биде прифатливо да седат во иста Влада чиј премиер го поддржува овој закон, Мехмети-Деваја со одговор:

„Така како што ние седиме во таа Влада и велиме дека таков закон нема да биде донесен. Станува збор за принципи на партнерство и на рамноправен начин се спротивставуваме на решенија кои за нас како учесници во владината коалиција се неприфатливи. Партнерски ги гледаме прашањата, партнерски не се согласуваме и партнерски се спротивставуваме“.

Поднесувањето на предлог-законот за бранители, според Клековски, може да се перцепира како проблем, но и како можност за разрешување на проблемите од 2001 година.

„Расправата за законот за бранителите, треба да се употреби за аргументирана расправа и како можност за разрешување на прашањето за цивилните жртви. Иронија е што командантите на ОНА се на врвни државни функции, а сме згрозени од можноста за одредени права за обичните припадници на ОНА. Меѓународните стандарди велат дека не може да се изедначат во правата сторителите на кривични дела, но тоа не значи дека не треба да има мерки за ресоцијализација, кои треба да им помогнат на припадниците на ОНА во целосното враќање во цивилниот живот“, порачува Клековски.

Во ДУИ денеска не сакаа да коментираат дали посебен закон за цивилни жртви може да биде решение за статусот на припадниците на ОНА, но нагласија дека инсистираат припадниците на безбедносните сили и борците на ОНА да имаат исти права и привилегии. Коментар за предлогот на Клековски немаше и во ВМРО-ДПМНЕ, од каде што порачаа дека решение за овој проблем гледаат во законот за бранители кој веќе е во собраниска процедура.