Убиство на Ноќта на вештерките во Тетово

Еден тетовец е убиен, а двајца се повредени при пресметка во ресторанот „Али Баба“

Гојко Ефтоски

Тетово – Обезбедувач во тетовска кафеана е убиен, а двајца негови колеги се повредени при крвата пресметка која се случи на Ноќта на вештерките во Тетово. Инцидентот се случил вчера околу 20.30 часот пред ресторанот „Али Баба“ во станбениот блок 82 на улицата „107“. Додека во ресторанот се одржувала приватна забава, тројца непознати напаѓачи се судриле со обезбедувањето. Во тепачката бил изваден и нож, со кој било извршено убиството. Другите двајца повредени веднаш се пренесени во болница, каде лекарите се борат за нивниот живот.

Како што дознавме, полицијата располага со првични информации за сторителите. Денеска претпладне едно лице за кое се сомнева дека е еден од извршителите, било пронајдено и приведено во полицијата.

Според сознанијата на полицијата, обезбедувањето на ресторанот било ангажирано од страна на организаторите на приватната забава. Во еден момент се доближиле тројца мажи кои се обиделе да влезат внатре, но не им било дозволено. Настанала расправија. Еден од напаѓачите со нож го избодел 39-годишниот Рамадан Адеми, а потоа убоди им нанел и на Нусрет Шабани (31) и Башким Цека (30) од Тетово.

Тројцата повредени веднаш биле пренесени во тетовската клиничка болница, каде Башким Цека кој се наоѓал надвор од животна опасност е задржан на лекување. Другите двајца повредени итно се упатени на лекување на скопските клиники.

Според информациите од СВР Тетово,  утрово околу два часот по полноќ како последица на тешките повреди, им подлегнал Рамадан Адеми, додека Нусрет Шабани бил задржан на болничко лекување и е во критична здравствена состојба.

Како што информира портпаролот на СВР Тетово, Маријан Јосифовски, полицијата извршила увид на лице место, каде биле пронајдени траги од крв, како и црна платнена футрола за нож. Полицијата трага по напаѓачите.

Локалот „Али баба“ денеска беше затворен. Се обидовме да контактираме со сопственици на соседните дуќани и ресторани. Меѓутоа, обидите останаа залудни, бидејќи од соговорниците не можеше ништо да се дознае. Единствено ни потврдија дека слушнале за тепачката и за последиците од крвавата пресметка, но дека ништо повеќе не им е познато.