Хилари Клинтон допатува во Тирана

Американската државна секретарка Хилари Клинтон, претпладнево допатува во четиричасовна посета на Албанија.

Таа ќе се сретне со претседателот Бујар Нишани, со премиерот Сали Бериша, како и со лидерот на опозицската Социјалистичка партија Еди Рама, а ќе има обраќање и пред пратениците на албанското собрание.

Поради посетата на Клинтон, сите патни правци низ кои ќе минува се затворени до 17 часот, а за безбедноста се грижат над 1.500 припадници на полицијата, вклучувајќи ја и специјалната единица „Ренеа“, како и онаа за брзи интервенции.

Во чест на доаѓањето на, како што ја нарекуваат, големата пријателка на Албанците, Тирана е накитена со 50 илјади знамиња, од кои 25 илјади американски и исто толку албански.

На Хилари Клинтотн ова и е прва посета на Албанија. Таа е четврт американски државен секретар кој ја посетува оваа земја по падот на комунистичкиот режим. Прв во Тирана стапна тогашниот државен секретар Џејмс Бејкер, во 1991 година, втората посета беше на Медлин Олбрајт во 2000 година, додека во 2003 Колин Пауер. Сепак како најголем настан за Албанците е посетата на екс шефот на американската држава Џорџ Буш, во 2007 година.