Што крие анексот на документот

Анексот на предлогот на Нимиц што го објави агенцијата МИА

Државната агенција МИА вчера соопшти дека до неа бил доставен оригинален документ од предлогот на Метју Нимиц од 7 октомври 2005 година.

„На документот, со ознака за доверливост, е содржано писмо на медијаторот Метју Нимиц до преговарачите Никола Димитров и Адамантиос Василакис, предлог за решение на името и анекс на предлогот во кој се прецизирани идентитетските прашања. Подоцна Игор Џундев од постојаната мисија на Република Македонија во ОН го испраќа предлогот до тогашниот претседател на државата Бранко Црвенковски, тогашниот премиер Владо Бучковски и тогашниот министер за надворешни работи, Илинка Митрева“, се вели во текстот на МИА.

Во него понатаму се потенцира дека во предлогот во точка Ц, јасно стои дека идентитетските прашања ќе бидат содржани во анексот на документот, кој е даден во прилог.

„Во анексот на документот на кој се повикува предлогот, во делот на националност нема македонски, ’macedonian‘, туку постои терминот ’граѓани на Република Македонија‘, како ознака за националноста. Во делот за јазикот наместо ’македонски‘ –’macedonian‘, стои ’македк‘ – ’macedc‘“, тврди МИА и додава дека овој предлог во 2005 година бил прифатен од сите политички партии, освен од ВМРО-ДПМНЕ, чиј лидер Никола Груевски го напуштил состанокот.

„Црвенковски тврдеше дека тој предлог ги гарантирал идентитетските прашања, а во завчерашното интервју на една национална телевизија тој повторно истакна дека идентитетот е гарантиран. Анексот на предлогот на Метју Нимиц од октомври 2005 го потврдува спротивното. Во декември 2009 година, тогашниот министер за надворешни работи на Грција, Димитрис Друцас, во дискусија во грчкиот парламент истакна дека идентитетските прашања биле внесени во преговорите со предлогот на Метју Нимиц од октомври 2005 година, предлог што го одби сегашниот премиер Груевски од улога на опозициски лидер “, посочува МИА.