Тие купуваат, а ние продаваме време

Чистката во ВМРО-ДПМНЕ – маркетиншки трик или обид за политичко проветрување?

Жаклина Хаџи-Зафирова
Светлана Унковска



Таканаречениот нов бран во владејачката ВМРО-ДПМНЕ за малку ќе го фрлеше во втор план трагичниот настан со петкратното убиство кај Смилковско езеро, како и акцијата „Детонатор“. Веќе не се говори толку многу ниту за претстојниот Самит на НАТО во Чикаго, а под плаштот на смените на едни и именувањата на други кадри на партијата на власт, паѓаат во сенка и огромната сиромаштија, невработеноста и економските проблеми.

Премиерот Никола Груевски деновиве рече дека новиот бран имал одличен одзив кај граѓаните, кој, како што истакна е „добра работа и покрај критиките од опозицијата“.

Според лидерот на СДСМ, Бранко Црвенковски, пак, кадровските смени во владејачката партија се обид за целосно замајување и манипулирање со јавноста. „Груевски, соочен со катастрофалните состојби и тоа во сите сфери во општеството, свесен дека незадоволството на граѓаните од ден во ден се' повеќе расте, по којзнае кој пат се обидува да најде некој друг виновник. Овој пат виновниците ги најде во слепите партиски послушници што во целиот изминат период беспоговорно ги спроведуваа неговите политики. Значи политиките остануваат, Груевски останува, курбан ќе одат некои луѓе од вториот, третиот ешалон“, рече Црвенковски.

Политичките аналитичари оценуваат дека смените на кадрите од понискиот ешалон или како што веќе популарно се нарекува „новиот бран“ всушност е само една добра стратегија кон јавноста и клучен маркетиншки проект на владејачките партии, во пресрет на локалните избори.

Петар Арсовски, комуниколог, во колумна за нашиот весник, направи анализа за тоа на кој начин и со каква стратегија се води целата кампања. Тој вели дека со ваквиот проект од облас��а на политичкиот маркетинг, владејачката партија спроведува интензивна кампања држејќи ја оваа тема активно во медиумите.

„Со таквата стратегија ВМРО-ДПМНЕ се надева дека ќе го амортизира незадоволството кај електоратот преку понудени жртвени јагниња од сопствените редови, а кај сопствените симпатизери ќе го намали незадоволството со тоа што за нови луѓе ќе обезбеди полесен пристап до „грнето“, оцени тој. Арсовски тврди дека со овие смени нема ништо да се промени бидејќи и натаму реалноста е нискиот стандард на граѓаните, нивото на демократија, недостиг на напредок, членството во НАТО и ЕУ и така натаму. Смените во пониските ешалони на власта, според Арсовски, претставуваат интервенција во политичкиот менаџмент, наместо во политичкото водство. Со други зборови, Арсовски илустративно опишува, дека вториот и понискиот ешалон, односно менаџментот се грижи за тоа дали „локомотивата“ има гориво, но доколку таа вози во погрешна насока, проблемот не се решава, туку се продлабочува.

Комуникологот Гоце Пачемски вели дека не е изненаден од тоа што „новиот бран“ содржи комуникациска компонента која смета дека е само еден дел од проектот кој допрва треба да се види во јавноста.

„Можеби изненадувањето ќе претстои. Од ова досега јас како граѓанин немам многу полза. Онака како што сега се презентира мислам дека не се работи само за комуникациски аспект, туку сето ова има и политичка платформа, а можеби и нешто друго на кое само му ги гледаме контурите, од она што комуникаторот сака да ни го соопшти во моментот. Многу е рано за детални анализи ако се земе моментот на политизација околу тоа“, оценува Пачемски кој вели дека не сака се' уште да дава квалификации дека се работи за политичка и комуникациска стратегија. Според него, новиот бран нема врска со НАТО, но не исклучува дека не е поврзано со локалните избори, имајќи го предвид досегашното однесување на ВМРО-ДПМНЕ пред избори.

Политичкиот аналитичар Мерсел Биљали коментира дека „новиот бран“ е само замајување и на јавноста и нејзино дефокусирање од инцидентите, трагедиите и економско-социјалната состојба.

„Тие го прават тоа бидејќи знаат дека има позитивен одговор во јавноста. Тие купуваат, а ние, како јавност, продаваме време. Цело време кажуваат дека се многу блиску во откривање на сторителите на петкратното убиство, а на некој начин се е блокирано и замолчено“, оценува Биљали, кој е скептичен дека нешто ќе се случи со самитот на НАТО за кој прогнозира дека само ќе се повтори истата реченица од Букурешт.