Ни камери ни слика од игралиштата во Аеродром

Исчезнаа камерите што требаше да ги контролираат активностите на децата низ Аеродром

Бојан Шашевски

Многу кратко траеше еуфоријата околу комплетното модернизирање и инсталирање на 24-часовен видеонадзор на новите детски игралишта во општината Аеродром. Иако имаше спектакуларна најава од општинските власти, а градоначалникот Ивица Коневски неколку пати го фалеше проектот за монтирање камери со кои родителите преку интернет-конекција од домовите во секое време ќе можеле да ги контролираат и следат активностите и игрите на своите деца, сепак, само две од осумнаесетте предвидени еколошки игралишта добија камери. Но, сега ги нема ни тие две камери. Неколку граѓани од Аеродром велат дека по брзата акција на Општината, инсталираните видеопомагала кај градинката „Синоличка“ и новиот парк во Ново Лисиче постојано биле или блокирани или во дефект, па одреден период претставувале повеќе декорација за игралиштата отколку што ја вршеле основната функција. Сега, пак, воопшто и ги нема на игралиштата.

„По толку фалење и најави, вистинска премија беше да се конектирате на линкот на општинската веб-страница и да ја вклучите камерата. Џабе ги поставија. Камерите стоеја само како украс. Па, сепак, кога мислевме дека, конечно, ќе профункционираат, надлежните ги тргнаа“, вели Никола Велковски, жител на општината Аеродром

Марија Стојановска, чиј дом се наоѓа близу детскиот парк во Ново Лисиче, вели дека за поздрав е проектот со новите игралишта, кои се градени од еколошки материјали, гумена подлога, урбана опрема и модерни реквизити, како што се вртелешки, нишалки, клацкалци и лизгалки, но, сепак, според неа, сосема е неодговорно од Општината да им овозможи на граѓаните видеонадзор за своите деца, за потоа да тврди дека уредите се неисправни или дека добиваат прекори од Дирекцијата за заштита на лични податоци.

„По објаснувањата за технички проблеми и тешкотиите за нивно одржување, на крај, излезе дека била нарушена приватноста на дечињата. Како може Општината да прави договори со фирми и да рекламира видеокамери без претходни усогласувања со Дирекцијата за заштита на податоци. Па, тие законски рамки, прописи и правилници за приватност не постојат од вчера. Ниту, пак, ние сме од вчера“, вели Стојановска.

Од Општина Аеродром потврдија дека по првичната идеја за поставување камери заради зголемување на безбедноста на децата, проектот бил стопиран по сугестија на Дирекцијата за заштина на лични податоци.

„Проектот стартуваше со поставување две камери во детското игралиште во населбата Ново Лисиче, но во меѓувреме Дирекцијата за заштита на лични податоци посочи дека на тој начин се нарушува приватноста на граѓаните, по што Општината реши да се откаже од реализацијата на овој проект и ги отстрани видеокамерите“, информираше Маја Манчевска, портпаролка на Општина Аеродром, и додаде дека од истата причина воопшто не биле инсталирани вакви уреди на другите игралишта.