Лебот во септември поскапува за 15-20 отсто

Маја Томиќ

Следува нов ценовен шок за граѓаните. Од септември ќе поскапи лебот. Мелничарите најавуваат дека зголемувањето на цената ќе биде од 15 до 20 отсто. За колку ќе биде повисока цената на векна леб прецизно ќе се знае во септември. Тие велат дека биле принудени на ваква мерка, поради тоа што за приближно толкав процент скокнала и цената на пченица што ја увезуваат од Србија.

„Зголемени ни се сите трошоците, а најмногу цената на примарната суровина, пченицата. Од Србија ја купував за 14,5 денари за килограм, а сега таа чини 16,5 денари“ , вели сопственик на мелница, кој објаснува дека домашното производство на пченица е од 50 до 70 отсто помало од вкупните потреби и затоа мора да се увезуваат значителни количества. „Ние произведуваме околу 150.000 тони пченица годишно, од која 40-50 отсто е добиточна храна, а другото е наменето за прехрана на населението, што е премалку за покривање на потребите“, додава тој.

Мелничарите веќе подолго време се ориентирани кон увозот на пченица, најмногу од соседна Србија, не само поради недоволните количества на домашниот род, туку и затоа што не можат да се усогласат со земјоделците околу висината на откупните цени. Годинава земјоделците бараа откупната цена на пченицата да не биде пониска од 15 денари за килограм, а мелничарите и трговците да им ги исплатат парите најдоцна до почетокот на новата сеидба. Овие, пак, не прифаќаа цена повисока од 13 денари за килограм и не склучија договори за откуп со земјоделците. За потсетување, Владата на почетокот од годинава интервенираше за да го спречи растот на цените на лебот и на другите производи од брашно, кои се случија два пати во период од два месеца поради недостигот од пченица на домашниот пазар и скапата увозна суровина. Така, Владата им даде на мелничарите пченица од стоковните резерви по цена од 16 денари за килограм, во ситуација кога увозната пченица чинеше 20 денари. Сепак, иако мелничарите добија од државата 40.000 тони по пониска цена, не падна и просечната цена на лебот од 20 денари.

Како и да е, граѓаните есенва ќе го извлечат подебелиот крај и заедно со сите други поскапувања, ќе плаќаат и поскап леб. Дека трошоците за живеење се зголемени во однос на лани, покажаа и најновите статистички податоци за јули, кога бил измерен пораст на трошоците за живеење, односно инфлација од 3,8 отсто, во споредба со истиот месец лани.

Притоа, за една година најмногу поскапеле маслото за јадење - 33 отсто, шеќерот - 13.6, лебот - 11.5, струјата - 5,4, транспортот - 3,7, сирењето и јајцата - 5,3 и месото - 3,2 отсто. Единствено поевтини се овошјето и зеленчукот.

Банкарите, стопанствениците и експертите уште во јуни посочуваа дека инфлацијата ќе расте затоа што ќе се зголемуваат цените на струјата и на храната. Тоа го покажа анкетата на Народна банка, при што како најважни фактори што би влијаеле за повисоки инфлациски бранови биле наведени: глобалната економска состојба, очекувањата за натамошен раст на светските цени на енергенсите, растот на цената на храната на светските берзи и очекувањата за ново зголемување на цената на електричната енергија.