Забрзани подготовки за 8 Септември

Интензивно се работи на објектите предвидени да бидат промовирани на Денот на независноста

Деспина Трајковска

Пуштање на фонтаната на споменикот Александар Македонски, отворање на Музејот на ВМРО, промоција на новата аеродромска зграда на „Александар Велики“, предавање во употреба на пешачката зона со јапонски цреши на улицата „Никола Вапцаров“... Засега, ова е листата со објекти кои на 8 Септември ќе бидат и офиц��јално промовирани во јавноста и пуштени во употреба. Можно е во последен момент таа да се прошири со портата, со булеварот „Климент Охридски“, новата ограда и илуминација на мостот „Гоце Делчев“.

Надлежните тврдат дека крајот на изградбата на сите овие објекти случајно се совпаднала со државниот празник, кој годинава ќе одбележува 20-годишен јубилеј. Од Град Скопје не можат со сигурност да потврдат дали некој од проектите кои се во фаза на реализација ќе бидат готови и промовирани токму на денот на државноста.

„Градот е во фаза на реализација на повеќе инфраструктурни проекти. Најголемиот дел од проектите се реализираат според предвидената динамика на изведувачите. Градот нема да инсистира кај изведувачите да ги забрзаат проектите за сметка на квалитетот на изведбите. Доколку за празникот на државноста некој од проектите биде комплетно завршен, по тој повод ќе биде предаден во употреба“, велат од кабинетот на градоначалникот Коце Трајановски.

Ако не завршат со проширувањето на „Климент Охридски“ и со подновата на мостот „Гоце Делчев“, градските власти сигурно ќе финишираат со реконструкцијата на тротоарите во строгиот центар по кои на денот на државноста се очекува да минат илјадници граѓани што планираат да присуствуваат на централната прослава на плоштадот. Неизвесно е дали ќе можат да минат и низ портата, оти од Министерството за култура вчера не можеа да потврдат дека објектот кој , всушност, ја симболизира македонската државност ќе биде готов и промовиран на празникот.

„Министерството за 8 Септември ќе го предаде во употреба музејскиот комплекс, а ќе изврши и промоција на 130 тома македонска книжевност преведена на англиски јазик“, изјавија вчера од Министерството.

Огномет кај Воинот од кој ќе прска вода

Споменикот и фонтаната на Александар Македонски ќе бидат најголемата атракција што е планирана да го одбележи јубилејот на државноста. На 8 Септември ќе проработи фонтаната, а граѓаните, конечно, ќе го видат во целина гламурозниот споменик, фалангата, лавовите... До нив ќе биде сместена бината, како дел од музичката програма што ја организира Агенцијата за млади и спорт. Таа на сите присутни граѓани ќе им подели бесплатно музичко ЦД, компилација од најголемите македонски хитови. Свеченоста ќе се одбележи и со спектакуларен огномет што ќе трае најмалку 6 минути.

Празнична промоција на двокатните автобуси

И промоцијата на двокатните автобуси се планира за празникот. Случајно или не, токму дотогаш треба да заврши хомологацијата на кинеските автобуси за, конечно, да бидат пуштени во сообраќај. По скопските улици ќе почнат да возат вкупно 68 даблдекери, од кои еден со отворен покрив. Со него, наводно, ќе се вози дел од власта за да направи обиколка на центарот на Скопје. Освен даблдекерите, планирано е на 8 Септември во сообраќај да се пуштат и најмногу до 16 автобуси на „Лаз“, кои неделава биле испорачани од Украина.