Крпење дупки на повик

ЈП „Улици и патишта“ oд денеска ќе крпи дупки на повик. Секој оној што ќе се јави и ќе пријави дупка на бројот 15 300 може да очекува дека во рок од два дена надлежните ќе ја завршат работата. Така барем гарантираат од „Улици и патишта“ каде што очекуваат за кусо време по скопските улици да нема ниту едно парче раскопан коловоз. Сепак, акцијата нема да важи и за оштетените општински улици.

„Заедно со Град Скопје почнавме акција за санирање на сите дупки низ центарот но градот, но е нормално дека има улици во другите општини што не можеме секогаш да знаеме во каква состојба се. Затоа со оваа акција ќе им зададеме завршен удар на дупките низ градот“, најави вчера Синиша Ивановски, директор на „Улици и патишта“, кој очекува дека акцијата ќе придонесе по градските улици да нема ниту една отворена дупка или прокоп.

Тој информираше дека граѓаните можат да пријавуваат дупки секој работен ден на телефонскиот број 15300, кој ќе биде во функција 24 часа. Повикот не е бесплатен, односно се тарифира како разговорите во фиксната телефонија.

Подетални информации кои улици се опфатени со најавената акција има на интернет-страницата на претпријатието www.uip.gov.mk. Инаку, ЈП за анимирање на граѓаните за акцијата, закупи девет билборди за кои потроши 3.500 евра. (Дс.Т.)