Друцас го кани Груевски на средба

Како ќе оди Груевски на референдум кога на членовите на ВМРО-ДПМНЕ им кажува дека нема да се предаде, прашува „Елефтеротипија“

Миркица Поповиќ

Можност за разврска на проблемот со името во Њујорк не постои поради недостиг од желба од страна на македонскиот премиер, тврди весникот „Елефтеротипија“, известувајќи од настаните во Њујорк. „Како ќе оди на референдум за името кога и самиот им има кажано на членовите на неговата партија дека нема да се предаде“, прашува јав��о во извештајот „Елефтеротипија“.

Првите средби во Њујорк на грчките функционери, главно, поминаа во повторување на грчките црвени линии, со демантирање дека го напуштаат принципот ерга омнес и со негирање дека има тајна дипломатија за спорот. Тоа го потврдија премиерот Јоргос Папандреу по средбата со генералниот секретар на ОН, Бан Ки Мун, и со шефот на дипломатијата, Димитрис Друцас, по средбата со Метју Нимиц.

„За нас во преговорите најважна е суштината, односно името за кое ќе се договорат двете страни да се користи од сите. Доколку е потребна промена на Уставот на државата за да се постигне ова, тогаш ќе мора да го направат и тоа“, изјави Друцас за новинарите.

На барањето да ги објасни за шпекулациите дека Алекс Рондос и Марилена Копа се вмешани во тајна дипломатија со Скопје, Друцас рече дека не постои ниту тајна дипломатија ниту, пак, паралелен преговарачки процес. „Преговорите се транспарентни. Уште од првиот момент кажавме дека преговорите се одвиваат во рамките на ОН. Сепак, сметаме дека директни контакти со владата во Скопје може само да го помогнат преговарачкиот процес. Кога говориме за директни контакти меѓу двете страни, познато е дека самиот премиер Папандреу веќе неколку пати презема иницијативи и се сретна со премиерот Груевски. Доколку Груевски е во Њујорк, сега ние повторно ќе преземеме иницијатива за да се сретнат двете страни“, изјави грчкиот министер.

Средбите на европратеничката Марилена Копа со македонската страна ги карактеризираше како дел од овие иницијативи за подобрување на односите меѓу двете држави, исто како што се и неговите средби на различни меѓународни форуми и конференции со македонскиот министер Антонио Милошоски. Покрај Копа, грчкиот министер спомена дека и други членови на заедничката парламентарна група имаат контакти со македонската страна за прашањето за името, како, на пример, Ставрос Лабринидис, заменик-претседател на Европарламентот, Ани Подимата и Јогос Кумуцакос. Според него, сиве овие средби се од исклучителна важност за преговорите во рамките на ОН и грчката страна е отворена за поголем број личности на различни позиции што би можеле да ги пренесат пораките на Грција во спорот за името. Друцас повтори дека Грција има политичка волја да се реши името, но дека мора да се почитуваат црвените линии. „Ова е единствениот пат за нас“, додаде грчкиот министер.

За Алекс Рондос, кој, наводно, ги влече конците на грчката дипломатија, Друцас рече дека е добар познавач на Балканот и стар соработник на грчкото МНР. За човекот, кој, според грчките медиуми, само му создава главоболки и загриженост на новоназначениот шеф на грчката дипломатија, Друцас истакна дека нема институционална позиција и никаква официјална поврзаност со грчкото МНР и со владата.