Платите на дипломатите во слободен пад

Новите амбасадори за Атина и за Виена вчера ги бранеа програмите во МНР

Платите на дипломатите на Македонија во странство се во слободен пад, па по првата редукција годинава, беше направена и втора, или заедно за неколку месеци се истенчија за осум отсто во однос на минатата година. Освен доцнењата на платите, МНР неофицијално ги притиска дипломатите да се ценкаат за наемнините, иако интерните анализи покажале дека по таа основа, годишната заштеда ќе биде само две и пол илјади евра. Според упатените, со секојдневни инвенции во правото се бараат дупки како да се намалат приходите на вработените за да се надомести трошокот за прекубројните вработувања во МНР, каде што, како и во други институции, министерот шетал по канцелариите за да открие некоја вишок маса за седење.

Жртва на штедењето се и новоименуваните десет амбасадори летово, од кои само три заминаа во странство (ЕУ, НАТО и Берлин), а двајца други дури вчера ги презентираа програмите во Министерството - Сашко Стефков за Атина и Ѓорѓи Филипов за Австрија. Другите петмина (за Тирана, Стокхолм, Анкара, Љубљана и Софија) ќе почекаат, некои и до почетокот на идната година. Место амбасадори во некои од тие дестинации, МНР испрати вршители на должност, а со цел да оствари некои ситни заштеди, иако штетата од таквите потези е многу поголема од материјалната добивка.

Инаку, новиот амбасадор Стефков вчера најави дека приоритет на новата функција ќе му биде градењето добрососедски односи со Грција, унапредување на билатералната комуникација и продлабочување на економските врски. Стефков ќе биде трет амбасадор на Македонија во Грција, а на таа функција доаѓа по еден мандат како амбасадор во Брисел и како советник на премиерот Никола Груевски. Продлабочување на соработката меѓу Македонија и Австрија во сите области од заеднички интерес и зајакнување на економските релации се приоритетите што ги најави новиот амбасадор во Виена, Ѓорѓи Филипов, кој на оваа функција дојде по амбасадорувањето во Германија. (Н.Р.)