Нимиц нуди оптимизам, а не предлог

Посредникот сега се откажува од предлози за решение

Претседателот Ѓорге Иванов имаше средба со медијаторот Метју Нимиц во Њујорк од која не дојде предлог, туку порака дека двете земји се тие што треба да го решат спорот за името.

„Не давам нови предлози. Изминатите години давав предлози до страните. Тие никогаш не беа во целост задоволителни, но за некои од идеите мислам дека вредеше што разговаравме. Затоа се чувствувам позитивно во тој правец“, изјави Нимиц по средбата.

Сп��ред медијаторот Нимиц, има зголемено чувство на доверба дека проблемот може да биде решен со дијалог на многу високо ниво, меѓу раководствата на двете земји.

„Тоа е многу позитивен развој. Чувствувам дека страните сега зборуваат меѓу себе за работи што се во рамки каде што може да се видат некои очекувања дека евентуално може да се најде решение на овој проблем“, изјави посредникот на ОН.

На прашањето дали нивото на доверба меѓу двете страни е доволно за да најдат решение до крајот на годинава, Нимиц рече дека е оптимист:

„Го правам ова многу години во име на ОН и секогаш имав правило да не правам претпоставки за крајните рокови, затоа што мислам дека самонаметнати рокови никогаш не се добри за ваков тип преговори. Тие создаваат лажни очекувања и непотребни разочарувања ако роковите се промашат. Затоа не би зборувал за рокови. Би рекол дека работејќи на ова прашање долги долги години, ми се чини од 1994 година, гледам дијалог што ми дава реалистички очекувања дека може да дојде до заемно решение во кое двете страни ќе чувствуваат дека ги постигнале националните цели и ја заштитиле националната гордост“, одговори тој.

Последната средба со медијаторот на високо ниво беше во февруари, во Скопје. Инаку, во најавата од кабинетот на Папандреу за неговите билатералните контакти во Њујорк не е предвидена средба ниту со Иванов ниту со премиерот Никола Груевски, кој и вчера не беше сигурен дека ќе замине за Њујорк. (Н.Р.)