Стопирани ископувањата над хотелот „Тасино чешмиче“
Tеренот треба да биде вратен во првобитна состојба, или да се направи потпорен ѕид
Ископувањата на земјиштето над хотелот „Тасино чешмиче“ се запрени откако интервенираше Градежната инспекција на Општина Центар. На сопственикот на хотелот му е наложено во рок од 15 дена да го врати земјиштето во првобитната положба или да постави потпорен ѕид за да се заштитат загрозените куќи. Жителите од улицата „Партение Зографски“ стравуваат за безбедноста на своите домови поради големите ископувања што ги врши сопственикот на хотелот „Тасино чешмиче“, над самиот објект. Тие со неверување го исчекуваат исходот од долгогодишната драма, која трае речиси десет години.
Стојан Николовски, чија куќа е една од најзагрозените, стравува дека доколку не се заштити, куќата ќе му пропадне во длабоката јама. „Имам голема штета веќе со години и мојот дом е во опасност од уривање“, вели Николовски.
„Доколку сопственикот не го врати земјиштето во првобитната положба во рок од 15 дена, ние ќе го сториме тоа на негова сметка. Дефинитивно, направени се ископи во големи размери, па од тие причини, денеска побаравме ИЗИИС да се изјасни за начинот на кој би се затвориле ископувањата без последици за околината“, ни изјави вчера Милан Пижула, главен градежен инспектор во Општина Центар. Тој потврди дека сопственикот на „Тасино чешмиче“ не поседува дозвола за изградба на локацијата, ниту, пак, има поднесено барање за тоа.
Инаку, од Општината потврдуваат дека првичните ископи над „Тасино чешмиче“ започнале речиси пред десетина години, но и покрај решенијата за нивно стопирање, сопственикот на хотелот продолжил со своите намери. (В.Д.) |
