Насловна

Македонија се договара со Албанија, Црна Гора и со Косово

Претседателот Ѓорге Иванов домаќин на регионална претседателска конференција во Охрид

Македонија, Албанија, Црна Гора и Косово споделуваат европски вредности и идентична визија за иднината. Врвен приоритет за четирите земји е забрзана интеграција во Европската унија и во НАТО, а реализирањето на овие заеднички стратегиски цели е можно само со интензивна билатерална, но уште позначајно, регионална соработка.

Тоа е пораката што македонскиот претседател Ѓорге Иванов како домаќин и неговите колеги од Албанија - Бамир Топи, од Црна Гора - Филип Вујановиќ и од Косово - Атифете Јахјага ќе ја испратат од третата Регионална лидерска средба, што ќе се одржи денеска и утре во Охрид, а ќе биде упатена и до Брисел и до европските престолнини.

Дарко Костадиновски, советник за надворешна политика во Кабинетот на претседателот, изјави дека Иванов ќе подвлече дека тоа значи оти четирите земји знаат европски да се однесуваат, што е особено значајно имајќи ги предвид проб��емите со кои Унијата се соочува и предизвиците за проширувањето. Тоа, воедно, ќе биде и апел за правилно вреднување на индивидуалните и заеднички постигнувања на секоја од земјите и апел за забрзана интеграција.

Од самитот, трет едноподруго во овој формат, се очекува да произлезат иницијативи за нови регионални проекти, особено во инфраструктурното и енергетското поврзување.

„Нашиот регион за само десетина години постигна драматична трансформација, драматичен успех, а главен двигател на овие процеси беше идејата за европско и евроатлантско обединување. Денес, на нашиот регион му е потребна и трансформација и успех во смисла на забрзан економски и одржлив развој, подигање на стандардот, подобрување на животниот стандард на граѓаните, подобра животна средина“, смета претседателот Иванов.

По средбите во Валона 2009 година и во Призрен 2010 година, Иванов ќе порача дека е време декларативноста да се преточи во акција и инспириран од резултатите и успехот што ги постигнаа земјите од Вишеградската група (Полска, Унгарија, Чешка и Словачка), ќе се заложи за структурализирање и зајакнување на оваа регионална иницијатива.

Имено, темите што се на агендата, проектите за кои ќе разговараат четворицата претседатели, како што оценува македонскиот претседател, е практично невозможно да се реализираат без ангажман на владите и доколку не се создаде обврска за наследниците да го следат започнатиот пат.

На Самитот во Охрид, претседателот Иванов ќе им предложи на своите колеги поширока листа на можности за јакнење на регионалната соработка и ќе апелира во вид на неформален заклучок да се одредат приоритетите на кои ќе се фокусира соработката во периодот до следниот состанок.

Отсега треба да ја трасираме визијата за нашите земји, за регионот за 2050 година и затоа, според Иванов, сега е моментот кога земјите треба заедно да настапат пред меѓународните финансиски институции за вакви проекти, велат од неговиот кабинет.

Во Охрид, шефот на македонската држава ќе покрене и предлог, доколку се појави ургентна потреба, и по примерот на земјите-членки на ЕУ, претседателите од регионот, да се среќаваат почесто, а не само еднаш годишно. Регионалната лидерска средба, како форма на соработка, за Иванов останува отворена и за сите други земји од регионот, вклучувајќи ги Грција и Србија. (Ж.Ѓ.)