Измамник продал туѓи обврзници за 12,7 млн. денари
З.И. ја сторил измамата уште во јуни 2006 година, но таа била откриена кога сопственикот на обврзниците се вратил од Германија
Единица за економски и компјутерски криминал поднесе кривична пријава до надлежното Јавно обвинителство против лицето З.И.(55) за сторени дела измама и фалсификување исправа.
Според наводите на пријавата, З.И. во периодот од 19 до до 27 јуни 2006 година со намера да се стекне со имотна корист, употребил фалсификувана лична карта, со која лажно се претставувал како Глигор Ш. од Берово. Тој во Комерцијална банка АД Скопје, односно во Експозитурата во дирекцијата на банката отворил денарска штедна книшка, а со фалсификувана лична карта во брокерската куќа „Илирика инвестмен“ склучил договор за посредување при купопродажба на хартии од вредност, со што ги довел во заблуда вработените во двете компании да склучат договори со него.
Имено, еден од оштетените бил сопственик на 243.000 евра во обврзници, кои потекнувале од старо девизно штедење, а биле евидентирани како негова сопственост во Централниот депозитар за хартии од вредност.
Осомничениот откако прибавил податоци за сопственоста на обврзниците и висината на износот, пристапил кон обезбедување фалсификувана лична карта на име на оштетениот Глогор од Берово, по што со вметната негова фотографија, на ден 19 јуни 2006 година во Комерцијална банка склучил договор за отворање денарски штеден влог по видување. Тој се потпи��ал во име на оштетениот, по што се упатил во брокерската куќа „Илирика инвестмен“ каде што побарал склучување договор за посредување при купопродажба на хартии од вредност. Брокерите, сметајќи дека пред себе го имаат вистинскиот сопственик на обврзниците, склучиле договор за посредување при купопродажба на хартии од вредност. Осомничениот и' издал налог за продавање обврзници на брокерската куќа во вредност поголема или еднаква на 83 отсто од номиналната вредност. Тој потпишал и овластување за брокерското друштво да може да пристапи на неговата сметка за да можат да ја извршат продажбата. Брокерот на куќата откако го добил налогот за продавање преку берза, извршил продажба на обврзниците на берза во три наврати, а во вкупен износ од 12.762.054 денари, или повеќе од 210.000 евра. Прибавените средства тој ги префрлил на штедната книшка во банката, а потоа ги подигнал. Инаку, оштетениот, кој живее во Германија, увидел дека е измамен во почетокот на јули кога се вратил во земјава, односно кога сакал да ја провери состојбата со неговите обврзници.
Од МВР потврдуваат дека З.И. отпорано е познат како сторител на кривични дела за што кривично бил пријавуван, а два пати и осудуван. (Љ.С.) |
