Насловна

Фалсификувале сини картони за преглед

Четворица пациенти фалсификувале сини картони за да не платат здравствени услуги од сопствен џеб. Ова го открила скопската Подрачна единица на Фондот за здравствено осигурување при проверката на исправноста на сините картони од минатиот месец. Било констатирано дека сините картони визуелно не се компатибилни со тие што ги издава ФЗОМ и дека лицата немале платено здравствено осигурување за периодот кога се лекувале. Поради неплатен здравствен придонес, овие пациенти требало да ја платат за здравствената услуга приватно, односно најмалку 1.000 денари, но со фалсификуваните сини картони платиле само партиципација од околу 150 до 200 денари. Фалсификуваните сини картони биле употребени за рендген-преглед во Клиниката за радиологија, како и за педијатриски прегледи во Институт по белодробни заболувања кај децата - Козле.

Против фалсификаторите се поднесени кривични пријави до Основното јавно обвинителство - Скопје за фалсификување исправа. Фондот ќе одржи средби со јавните здравствени установи во Скопје со цел подетална проверка на исправноста на документите што ги носат пациентите при прием, како и навремено детектирање фалсификувани сини картони. (Ј.Ј.)