Протест кај Табановце, автопатот се гради
КУМАНОВО - Четириесетина сопственици на земја и имоти од село Табановце вчера протестираа на автопатот незадоволни од висината на надоместокот за плодни парцели и градежно земјиште по кое минува втората коловозна лента од Коридорот 10. Градежните работи на оваа делница во должина од осум километри почнаа да се изведуваат пред околу еден месец, на просторот од граничниот премин кај Табановце до Куманово.
Претходно биле склучени договори со околу 150 сопственици на земјиште од селата Табановце, Речица и Долно Којнаре, во кои било предвидено сопствениците да се обесштетат со 2,5-5 евра за квадратен метар зависно од бонитетот на земјата. Стотина сопственици се согласија со таквата цена и надоместоците веќе им се исплатени. Другите, незадоволни од цената, се упатени своите барања да ги остварат по судски пат.
На вчерашниот протест незадоволните земјоделци од Табановце бараат надоместок од 5 евра за земјоделско место до 15 евра за дворни места и градежно неизградено земјиште. Тие изјавуваат дека веќе еден месец втората лента од автопатот се гради насила, а тие ќе протестираат и со порадикални мерки. (Ст.Б.) |
