Избрани супербрендовите во Македонија
Македонија ги избра своите супербрендови за 2009 година. Дваесет и пет производи и компании, кои се прогласени за супербрендови, завчеравечер ги добија признанијата од меѓународната организација „Супербрендс“, која работи на идентификацијата на водечки брендови на поединечен пазар.
Тоа се: „Акцент медија“, „Алкалоид“, „Бекутан“, „Кафетин“, ТВ Алсат М, „Би- милк“ на ИМБ, „Витаминка“, „Стоби флипс“, „Горска вода“, ДХЛ, „Златен даб“, „Златна книга“, К-15, „Капитал“, „Краш“, „Лек“ , „Мајкрософт Македонија“, „Мекдоналдс“, „Пекабеско“ , „Ронхил“, „Свислион“, „Скопски пазар“, „Т-мобиле“, Сити радио и „Космофон“. Супербрендовите ги избра стручен совет составен од 60-тина претставници на маркетинг агенции, медиуми, академски експерти и компании.
Квалитетот, одговорноста, разликувањето и емотивното влијание се четирите карактеристики, кои ги издвоија овие супербрендови од останатите 800 од кои се правеше изборот.
Во Македонија ова е прв избор на супербренд од меѓународната организација, која работи 16 години во 86 земји. „’Супербрендс‘ е нешто што недостасуваше во Македонија, нешто што на едно место ги обединува најмоќните, најрепрезентативните марки во Македонија“, рече министерот за економија, Фатмир Бесими, на доделувањето на признанијата.
Според Ред Лего од меѓународната организација „Супербрендс“, избраните македонски супербрендови се придружуваат на повеќе од 7.500 брендови низ цел свет. Борут Землјич, директорот за регионот Адријатик од „Супербрендс“, порача дека извонредноста, сјајниот дизајн, автентичните карактеристики и вистинската комуникација ќе бидат основи на водечките трговски марки во иднина. (МИА) |
