Потрагата по оружје продолжи во тетовско Ново Село

Запленети оружје и муниција, уапсено едно лице, кое
веројатно било поврзано со ликвидираната група кај Радуша

Гојко Ефтоски


НОВО СЕЛО - Татко со тројцата синови се приведени по завчерашната полициска акција во тетовско Ново Село, при што беше запленето поголемо количество оружје. Откако таткото признал дека самиот го набавил оружјето, синовите биле ослободени, а нему му е одреден притвор. Според МВР, постоеле индиции дека уапсениот Демир Мифтари (59) бил поврзан со еден од убиените во акцијата во Радуша, но случајот допрва ќе се расчистува.

Полициската акција во Ново Село внесе немир, вознемиреност и загриженост во селото, иако вчера на прв поглед се' беше мирно. Акцијата во четвртокот вечерта по претресот во куќата и во шталата, заврши со приведување на сопственикот Демир Мифтари (59) и на неговите три сина. Селаните тврдат дека полицијата влегла во населбата непосредно по погребот на Шабан Зенуни од соседното Мерово, кој беше убиен во полициската акција кај Радуша. „Уште кога заминувавме на погребот во Мерово ни беше сомнително зошто полицијата не не' пушташе да одиме“, ни рече жител на Ново Село. Револтот меѓу селаните е видлив на секој чекор.

„Пред акцијата, полицијата требаше да побара мислење од претседателот на Месната заедница и да го праша дали има оружје во селото. Јас знам дека по војната од 2001 година, оружјето е предадено“, вели еден од селаните.

Сепак, во двете куќи на семејството Мифтари полицијата пронашла три автоматски пушки, два пиштола, три револвери, но и тромблонски мини, бомби и поголемо количество друго оружје. При спроведувањето на акцијата немало инциденти и пукотници. Така било и при приведувањето на таткото и на неговите тројца синови, кои беа ослободени веднаш по распитот. Дознаваме дека во полицискиот распит таткото признал дека дел од оружјето пред 3-4 години му ги дал негов роднина, а останатиот дека е остаток од конфликтот во 2001 година, додека автоматската пушка ја набавил во Швајцарија. Тој не сакал да каже зошто го чувал оружјето, но во МВР се сомневаат дека бил поврзан со еден од убиените шверцери кај Радуша.

Градоначалникот на Општина Желино, Фатмир Изаири, вели дека над Рогле, кое е речиси споено со Ново Село, „веќе две-три недели има специјални полициски единици“.

„Не сум информиран ниту консултиран за нивниот престој. Никаква информација нема ниту во полициската станица Групчин, која реонски ги покрива двете села. Мислам дека локалната власт е запоставена“, смета Изаири. Тој апелираше до жителите во Општината за смиреност.