„Мериот“ ќе гради хотел во центарот на Скопје

Во луксузниот хотел ќе се инвестираат 38 милиони евра, а се очекува да биде отворен во 2013 година

Деспина Трајковска


Светскиот синџир хотели „Мериот“ официјално влезе на пазарот на македонското хотелиерство. Во срцето на Скопје во 2013 година се очекува да биде отворен првиот хотел од ваков ранг во Македонија и воопшто на Балканот. Неговата изградба вчера ја најавија Александар Ивановски, генерален директор на македонската компанија „Дивелоп груп“, и Ервин Карлтон, главен директор за развој за Европа на хотелите „Мериот“, кои потпишаа договор за соработка.

„Договорот, конечно, резултираше по деветмесечни преговори. Ве уверувам дека услугата што ќе се нуди во хотелот ќе биде на исто ниво како и во хотелите ‘Мериот‘ низ светот. Освен комфорот што ќе им се нуди на сите клиенти, истовремено сум убеден дека и Скопје, конечно, ќе добие ексклузивен хотел што одамна му е потребен. Ова ќе биде прв брендиран хотел во Скопје, интернационално управуван“, истакна возбудено вчера Ивановски, чија компанија ќе инвестира во изградбата.

Информираше дека наскоро компанијата ќе ја почне постапката за одобрение за градба, која е предвидено да заврши до крајот на 2012 година. Хотелот ќе се гради на површина од 20.000 метри квадратни, во сегашното зеленило спроти кафулето „Тренд“ на земјиште што компанијата го откупила од физичко лице.

Фасадата на објектот, што е дело на група австриски архитекти, ќе биде во арт-деко стил, спој на модерен и историски изглед додека внатрешноста на хотелот ќе биде во модерен луксузен стил. Случајно или не, неговата фасада ќе се вклопи со изгледот на објектите на скопскиот плоштад на кои со проектот „Скопје 2014“ им е наложен таков стил. Хотелот ќе има 180 соби, 16 луксузни апартмани, еден претседателски апартман, спа-центар, градина на највисокиот кат... Вкупната инвестиција на „Дивелоп груп“, која истовремено ја гради и деловната зграда на кејот на местото на поранешна Народна банка, е околу 38 милиони евра. Компанијата речиси половина од парите ги обезбедила преку кредити од наши и од странски банки.

И претставниците од „Мериот“ вчера не го криеја задоволството од своето влегување во Македонија. Тие истакнаа дека одамна планирале да се прошират и на Балканот.

„Во случајов најдовме вистински партнер и одлична локација за изградба на хотелот. Уверени сме дека ’Мериот Скопје‘ ќе биде успешен уште од првиот ден“ истакна Карлтон.

Честитки за соработката и најавениот проект двете компании вчера добија и од амбасадорот на САД, Филип Рикер, вицепремиерот Владимир Пешевски и министерот за транспорт и врски Миле Јанакиески.

„Мериот“ е водечка компанија за хотелиерство, која поседува повеќе од 3.400 хотели во 70 земји. Седиштето на компанијата се наоѓа во САД и има приближно 140.000 вработени.