Срам за државата, велат партиите

Премиерот Никола Груевски истакна дека е на страната на правото и на правната држава

Судирот меѓу полицијата и граѓаните на Шуто Оризари, политичките партии го оценија како „срам за државата со непотребно предизвикување инциденти и интервенции врз социјално најзагрозеното население“. Иако не се оправдува трговијата со илегална стока, сепак, партиите од опозицијата, но и од власта, ги осудија случувањата во оваа скопска општина. Воедно, тие сметаат дека најпрво е потребно полицијата добро да ја процени ситуацијата, па потоа да реагира.

Премиерот Никола Груевски рече дека и тој го осудува насилството, но истакна дека тој е на страната на правото и на правната држава.

„Во основа, секогаш осудувам кога има насилство. Во Шуто Оризари имаше примена на насилство и тоа не може никој да го оправда. Независно кои биле мотивите, причините или кој бил во право или не. Насилството е насилство и во една таква ситуација јас стојам на страната на спроведувањето на правото и на правната држава“, истакна вчера премиерот Груевски.

Најголемата опозициска партија оценува дека последните настаните се слика за неодговорниот однос на државата спрема жителите на Шуто Оризари, но и спрема полициските службеници, кои ја извршуваат својата професија.

„Случката во Шуто Оризари, судирот меѓу полицијата и социјално најзагрозените граѓани е срам за државата. Не може поради нефункционирањето на некои органи и служби, како што е Царината, да се случуваат вакви настани, чии последици можат да бидат многу тешки. Главното прашање е како Царината дозволила таа фалсификувана стока да влезе во државата и како стигнала до пазарџиите во Шуто Оризари? Второ, имаме правило на двоен аршин. Еден е аршинот за граѓаните на оваа општина, а друг е аршинот за висок полициски службеник во МВР, кој носеше фалсификуван часовник, а за што никој во МВР не презеде одговорност“, коментира Андреј Петров од СДСМ.

И либералдемократите го осудија овој настан и велат дека за овој инцидент министерската за внатрешни работи, Гордана Јанкуловска, треба да ја понесе одговорноста.

„Она што се случуваше во Шуто Оризари не оди во прилог на демократијата на една земја. Законите треба да важат на цела територија, но многу е важно дали тие се спроведуваат во цела Македонија. Полицијата треба да испита дали има пречекорување во дејствувањето на полицијата и доколку е така, министерката Јанкулоска треба да си понесе одговорност“, реагира Роза Топузова-Кареска од ЛДП.

Од ДУИ сметаат дека полицијата пред да ја спроведе интервенцијата, претходно морала да направи детална процена за тоа какви последици ќе предизвика.

„Мислам дека институциите, а во овој случај МВР, треба да бидат многу внимателни за секоја интервенција. Тие имаат можности и механизми претходно да добијат процени и да имаат информации како ќе се одвива една операција. Треба да се избегнуваат вакви случувања, а МВР мора да има претпоставка каков тек ќе добие една интервенција, притоа внимавајќи да не се предизвикаат судири со граѓаните“, вели Тахир Хани од ДУИ.

Нова демократија укажува дека државата најнапред треба да и' овозможи подобри услови за живеење на ромската етничка заедница, како една од најзагрозените категории од социјален и од економски аспект.

„Македонија, според Уставот, е социјална држава и затоа е потребно да покаже поголем интерес и грижа на оваа етничка заедница и да им овозможи услови за подобрување на нивниот живот. Знаеме дека најголемиот дел од нив живеат во екстремна сиромаштија и им се потребни средства за егзистенција. Во моменти кога тие услови не се обезбедени, сметаме дека нема потреба од демонстрирање сила“, оценува Флора Кадриу.

Со писмена реакција, во која се осудува инцидентот, се јави и Партијата на демократските сили на Ромите, кои се дел од коалицијата со ВМРО-ДПМНЕ.

„Во интервенцијата на специјалните полициски сили врз мирољубивите граѓани на пазарот во Општина Шуто Оризари беше применета прекумерна физичка сила, со што ја загрозија безбедноста на жителите во кои имаше жени и малолетни деца“, стои во реакцијата на партијата на Шабан Салиу. (Св.У.)