Повлечен дел од обвинението за набавката на тенковски делови
Со давање завршен збор, не на еден, туку на двајца јавни обвинители, случајот „Резервни тенковски делови“ се приведува кон крај. Но, токму поради големите промени што ги направија обвинителите во самиот диспозитив на обвинението, одбраната на петтемина обвинети побара своите завршни зборови да ги одложат за денеска. Адвокатите сметаат дека повлекувањето на одредени делови од диспозитивот дава можност за ново гледање на работите и дури потоа нивно произнесување по измените.
Со прецизирањето на обвинителниот акт, јавниот обвинител Бодан Лазаревски потврди дека нарачката на деловите се случила уште кон крајот на октомври 2001 година и дека такво барање доставил тогашниот началник на Генералштабот на АРМ, генералот Методи Стамболиски. Притоа, вкупниот износ со измените е намален од 266 на 209 милиони денари. Лазаревски обвини двајца од вработените во МО дека, наводно, знаеле оти бараното количество било големо и дека ќе се создаде залиха. Обвинителот во целост ги смени и имињата на фирмите на кои, по исплатата на средствата за тенковските делови, Митре Петковски им префрлал пари.
Вториот обвинител Петар Аневски рече дека од текот на постапката се потврдило дека е направена злоупотреба, за што одговараат пет лица. Тој го обвини ексминистерот Владо Бучковски за недомаќинско работење, бидејќи биле набавени повеќе од потребните делови. Аневски смета дека доколку се работело за ремонт на тенковите „Т-55“, наводно, требало да се набават и други делови, а на само оние кои се однесуваат на трансмисијата. Аневски смета дека МО исплатило пари на човек-фирма, а дека ставање на неколку потписи на договор е постапка со која се служат криминалци. За денес се очекува седумчасовен завршен збор на адвокатот Никола Поленак, кој најави презентирање на 80 страници текст. (Љ.С.) |
