Да мислиме на веќе родените деца
Душан Сарагинов, Скопје
Испровоциран сум да се јавам од кампањата на Владата на Македонија во врска со стимулациите за второ, трето ... дете, која во суштина ја оценувам позитивно. Но, сакам да предочам една работа што ја гледам секојдневно. Имено, само неколку метри од бараките на Општина Кисела Вода, во паркчето што го изгради самата општина, секојдневно една самохрана и релативно млада мајка, со детенце, по слободна процена од 1 до1,5 година, седната на тревникот покажува дека нема покрив над глава и живее, ни самиот не знам како.
Утринава повторно ја видов како, по дождливата ноќ, со неколку полупразни торбички го држи цврсто своето чедо и застаната на улицата како да чека да помине некој и да и' помогне. Ве молам, како медиум на кој прв му верувам и самиот редовно го читам да го актуализирате ова прашање и некако да и' помогнете на оваа жена, бидејќи и самиот имам мало дете и срцето ме боли кога ќе го видам неговото врсниче како страда под ведро небо. Пак ќе повторам, ја поддржувам акцијата на Владата за која зборував погоре, но ве молам да се започне со стимулации и помош на веќе родените деца и на ова детенце и мајка на кои таа му е повеќе од потребна.
Што претставува за една влада мал гест за помош, кој би бил посилен од какви било секојдневни кампањи и реклами, зашто тоа дете утре - ако некој му помогне - може да стане добар бранител на оваа држава, за која, според мене, ако е навистина таква, треба да си ги чува своите мали чеда.
Ви благодарам за можноста што ми ја дадовте да ви се обратам и се надевам дека во некој ваш број ќе прочитам дека нешто е сторено. Од моја страна, како единка, можам само да им дадам малку облека, обувки и по некој денар, но сепак мислам дека тоа нема да биде доволно за следната дождлива ноќ. |
