| „Алкалоид“ отвори најсовремен Институт за контрола на лекови
Институтот, кој е според најсовремените ГМП-стандарди и во него се инвестирани околу 8 милиони евра
Најголемата фармацевтска компанија кај нас „Алкалоид“ својот производно-технолошки процес вчера го заокружи со отворање на Институтот за развој и контрола на квалитетот. Во оваа најсовремена лабораторија, прва од ваков вид, ќе се развиваат нови модерни генерички лекови, но и ќе се врши контрола на лековите што се произведуваат и увезуваат во земјава, за што Министерството за здравство е во преговори со „Алкалоид“.
Институтот, кој е според најсовремените ГМП-стандарди, се изгради за нецела година и во него се инвестирани околу 8 милиони евра. Лабораторијата е опремена со најсовремена аналитичка опрема и инструменти и во неа ќе работат 80 високо специјализирани лица, од кои 50 ќе бидат нови вработувања.
„Со отворање на Институтот ’Алкалоид‘ ја потврдува својата определба за производство на квалитетни, безбедни и ефикасни лекови, рече на свеченото отворање на Институтот, генералниот директор на „Алкалоид“, Живко Мукаетов.
За тоа како глобалната криза се одразува врз „Алкалоид“, Мукаетов вели дека лекови не се пијат помалку, но се' потешка е наплатата на глобално ниво. „Во некои земји министерствата за здравство воведуваат формални програми за заштита на домашните производители, што ни создава дополнителни проблеми, но глобално сепак покажуваме раст“, појасни Мукаетов.
Институтот го отвори премиерот Никола Груевски. (Ј.Ј.) |
