Претходен број

Недостапниот пратеник Џемаили ќе се брани од слобода

Укинувањето на притворот покрај за Џемаили, се однесува за уште петмина други обвинети

Љубиша Станковиќ

Станува се' поизвесно дека недостапниот пратеник на ДУИ, Хисен Џемаили, ќе се појави на судското рочиште што е закажано за 5 февруари за случајот „Мавровски работници“. Вчера попладне на седница на Судскиот совет беше донесена одлука за прифаќање на понудените гаранции. Одлуката, покрај за пратеникот Хисен Џемаили, се однесува и за петмина други обвинети. Ваквата одлука доаѓа по најавите дека Џемаили понудил гаранции во недвижен имот во замена за укинување на потерницата и притворот што му беше одреден токму поради неговото непојавување во скопскиот Кривичен суд.

„Точно е дека до судот се доставени гаранции за пратеникот Хисен Џемаили. Можам да соопштам дека е донесена одлука на Кривичниот совет, што значи дека се прифатени предлозите за гаранции во недвижен имот во замена за укинување на притворот за обвинетиот, но и за други петмина. Одлуката на Судскиот совет доаѓа и по добиено позитивно мислење и од Јавното обвинителство“, ни изјави портпаролот на Основниот суд Скопје 1, судијата Седат Реџепагиќ.

Од скопскиот Кривичен суд потврдуваат дека за Џемаили е дадена гаранција во имот проценет на 300.000 евра, но оттаму нема информација што ќе се случи доколку другите дваесетина обвинети во предметот „Мавровски работници“, како и досега, не се појават на рочиштето закажано за почетокот на следниот месец. Имено, и за овие лица е одреден притвор, но и тие како и пратеникот Џемаили од септември минатата година не се одзвале на судските покани.

Ослободувањето на Хисен Џемаили од обврската да замине во затворот во Шутка уште во четвртокот го најави потпретседателот на ДУИ, Рафиз Алити, кој од Собранието на Македонија најави дека за него се дадени гаранции и дека тој не треба да оди во притвор. Одбраната на својот сопартиец Алити ја заврши со констатација дека тие имаат контакти со него и дека „Џемаили е на овој свет, не ја напуштил Земјата!“

И за бранителот на обвинетиот Хисен Џемаили, адвокатот Таип Елези, работата е речиси завршена. Во телефонски разговор Елези ни потврди дека за неговиот клиент како гара��ција е понудена куќа, но тој не можеше да каже кој е сопственик на понудениот имот. Адвокатот Елези појаснува дека со гаранцијата треба да биде укинат притворот за Џемаили.

Судскиот процес за сторени кривични дела организирање група и поттикнување на извршување геноцид и воени злосторства започна уште на 16 септември минатата година. На стартот на судскиот процес Хисен Џемаили не се појави, но од Собранието прати порака дека не му било познато оти е на листата на обвинети. На седница на Комисијата за деловнички и мандатно-имунитетни прашања, чиј член е и самиот Џемаили, му беше симнат неговиот пратенички имунитет, а тој вети дека ќе се јавува на судските покани. И од судот стигна потврда дека Џемаили ветил дека ќе присуствува на поканите, но оттогаш му се губи секаква трага.

Министерството за внатрешни работи, кое по налог на судијата Горан Бошевски требаше да го пронајде Џемаили, или не доставуваше одговор до судот за тоа до каде е постапката за негово пронаоѓање или кога ќе се случеше тоа, одговорот беше негативен, односно дека се постапува, но дека не можат да го пронајдат.