Членството во ЕУ и во НАТО е магнет за инвестиции

Членството во ЕУ и во НАТО, само по себе, не носи директни странски инвестиции и економски просперитет, но во голема мера придонесува за поголема атрактивност на земјата за инвестиции. „Сепак, странските директни инвестиции, пред се', бараат добро деловно опкружување, приспособена законска регулатива во областа на економијата и можности за заштита на конкуренцијата“, изјави вицепремиерот задолжен за европски прашања, Васко Наумовски, на вчерашната конференција на тема „Бенефитот за македонскиот бизнис од членството во ЕУ и во НАТО“, организирана од Американската комора во Македонија.

Според него, за придобивката од членството во ЕУ и во НАТО најдобро сведочи искуството што го имаа државите од Централна и од Источна Европа, а кои сега се членки на овие организации.

„Не постои држава од тој регион што станала членка на ЕУ и на НАТО и која не минала низ еден период на зголемен економски развој, намалување на невработеноста и зголемување на бројот странски директни инвестиции. Веруваме дека таков ќе биде и случајот со Македонија, откако нашата држава ќе стане членка на ЕУ и на НАТО“, рече Наумовски.

Офицерот за врски на НАТО во Македонија, Давид Хумар, оцени дека најголемите бенефити од членството во Алијансата за земјата се индиректни, а не директни. „Одговорот е многу едноставен, ќе погледнете во соседството и можете да ги видите големите инвестиции во тие земји. Сепак, постојат и директни придобивки, бидејќи НАТО има заеднички буџет преку кој може да инвестира во членките“, рече Хумар.

Тој посочи дека иако Македонија не е членка на Алијансата, сепак, НАТО инвестираше во реконструкцијата на патната инфраструктура во државата на потегот од Гевгелија до Скопје, при што додаде дека може да се очекуваат нови инвестиции штом таа стане полноправна членка. (МИА)