Пластичните ќеси - ќар за трговците

Од примената на наредбата за забрана за користење пластични ќеси, која почна од 1 јануари 2009 година, единствена корист имаат трговците, тврдат од Групацијата за производство и преработка на пластични маси при Стопанската комора на Македонија. Според сознанијата на групацијата, од продажбата на пластичните ќеси со носивост до пет килограми трговците остваруваат профит од околу 80 отсто во однос на набавната цена на пластичните ќеси.

Количината пластични ќеси што се во употреба согласно со наредбата во големите маркети е намалена за 50 отсто, додека производството е намалено за 40 проценти во однос 2008 година, пред примената на наредбата.

Групацијата за производство и преработка на пластични маси при Стопанската комора на Македонија посочува дека е мал процентот на користење ќеси од биоразградливи материјали. Министерството за животна средина и просторно планирање најави дека во процедура е иницијатива на Групацијата за употреба на биоразградливи ќеси, а потрошувачите да ги добиваат бесплатно и долгорочно да се помине целосно на биоразградливи ќеси. (МИА)