Центарот на градот во новогодишно розово руво
Денеска се очекува со новогодишен сјај да блесне и улицата „Македонија“ на потегот од плоштадот до Музејот на Скопје. Со тоа ќе заврши украсувањето и централното градско подрачје ќе светне во празнично руво. Градот и годинава задоцнето го доби новогодишниот декор, дали поради некоординираност со спонзорите или, пак, од причини познати само на учесниците во украсувањето.
Елката светна дури викендов, иако се најавуваше за претходната недела. И не само што е продорно розова, туку на многумина им боде очи симболичниот врв на спонзорот кој, како што коментираат граѓаните, е вишок, бидејќи ретко кој не знае која фирма е „облечена“ во розово.
Таква розова нијанса, како и најголемиот дел од новогодишните светлечки украси на плоштадот, ќе има и улицата „Македонија“. Вчера привршуваше монтирањето на лустерите и на другите украси што треба да засветат денеска. По должината на целата улица ќе има осумдесетина светлечки лустери во розова и жолта нијанса. Со светлечки црева ќе се обложат сите дрва, додека канделабрите ќе имаат наизменично розово светлечко црево или жолта светлечка елка. Речиси во идентично новогодишно руво се очекува денеска да осамне и улицата „Максим Горки“.
Традиционално, центарот на градот ќе живее во новогодишна атмосфера до 15 јануари. (Дс.Т.) |
