Во Штип над три илјади дивоградби

ШТИП - На подрачјето на Штип, во центарот и во други делови се регистрирани 3.020 дивоградби. Во почетокот на јули локалната самоуправа прва почна акција за евидентирање на нелегалните градби во очекување на законот што треба да ја регулира оваа област. Интересен е податокот дека сопствениците на околу 700 дивоградби сами ги пријавиле во општината.

Штипскиот градоначалник, Зоран Алексов, вели дека од легализацијата на нелегално изградените објекти очекуваат четири милиони евра во буџетот. Од оваа сума, 2,5 милиони евра ќе бидат инвестирани во комунална инфраструктура во населбите во кои нелегалните објекти се побројни од легалните, а 1,5 милион евра во изградбата на тунел под улицата „Ванчо Прќе“, која ќе стане пешачка зона. (И.Б.)