„Скендер-бег“ ќе влезе во Малиот ринг!

Општина Чаир се одлучи за второто решение со кое плоштадот навлегува во границите на општината Центар

Снежана Калабакова

„Скендер-бег“, најверојатно, ќе влезе во Малиот ринг! Откако Општината Чаир дефитивно го одбра второто идејно решение за новиот плоштад, со кое тој поминува преку своите граници и навлегува во општината Центар, стана јасно дека ќе биде неопходно да се направат нови промени на постојниот ДУП „Мал ринг“.

Плоштадот на Чаир зафаќа дел од Малиот ринг во кој се предвидени два објекта наменети за хотел и за деловно работење. Двете маркички се наоѓаат зад објектот на Филхармонијата, кој е во изградба и МНТ, до каде што, всушност, и се протега новиот плоштад „Скендер-бег“. Дали чаирскиот проект целосно ќе ги избрише објектите на Центар, или само ќе се намалат нивните габарити, како што првично предлагаше градоначалникот Изет Меџити, допрва ќе се расправа.

Општина Центар неодамна го донесе најновиот ДУП „Мал ринг“, но притоа не го имаше предвид идејното решение за кое Чаир се одлучи подоцна. Одлуката плоштадот „Скендер-бег“ да се гради според второто идејно решение, најверојатно, ќе иницира нови измени на Малиот ринг. За градоначалникот на Чаир не е проблем дури и ако не бидат направени потребните измени со отстапки за двете вцртани маркички. Дури и тогаш, смета тој, нема да има проблем проектот да се реализира и плоштадот да добие површина од над 20 илјади квадратни метри.

По првичните разговори, немало други контакти меѓу градоначалниците на Чаир и на Центар околу изградбата на плоштадот „Скендер-бег“. Сепак, Меџити потенцира дека официјално ќе го достават проектот до Одделението за урбанизам на Центар, а потоа ќе чекаат официјален одговор оттаму.

Од Општина Центар потврдуваат дека им била презентирана идејата на Чаир за изградба на плоштадот „Скендер-бег“. Велат дека во делот на Центар замислениот плоштад зафаќа приватни парцели за кои ќе биде потребно да се направи експропријација, а потоа и дополнување во Деталниот урбанистички план, што не е едноставен процес.

„Посреќно решение би било кога проектот би се реализирал само на територијата на една општина, во случајов на Чаир, но и ова решение не е неизводливо. Се' уште не се почнати никакви подготвителни работи за овој проект и затоа не се почнати и никакви постапки. За првичната идеја на Општина Чаир, до нас не се доставени официјални барања кои треба да бидат разгледани од страна на нашата Комисија за урбанизам“, објасни Јовица Ацковски, одговорен за информирање во Општина Центар.

Чаирскиот капитален проект од пред стоковната куќа „Илинден“, која сега е дел од Тетовскиот универзитет, се шири до Даут-пашиниот амам на една страна и до стоковната „Мост“. Нивелираниот плоштад преминува од другата страна со покривање на булеварот „Гоце Делчев“ и завршува на територијата на Општина Центар во делот помеѓу објектите на Филхармонијата и МНТ. Од јужната страна плоштадот граничи со уличката преку која сега се влегува на паркингот пред „Илинден“, кој со реализација на проектот ќе стане подземен паркинг.