Македонско изненадување за групите за пречек во САД

Наместо американски војници, во Њу Хемпшир пречекаа македонски мировници

ПОРТСМУТ, Њу Хемпшир - Извици „здраво“ (на македонски) одекнуваа во понеделникот на терминалот на меѓународниот аеродром Пис во Портсмут, кога групите за пречек се собраа да го прослават нивниот 300-ти лет и тогаш поздравија 100 припадници на македонската армија, наместо војници од САД на кои вообичаено им посакуваат добредојде. Групите за пречек вообичаено не знаат кој воен огранок го поздравуваат или го испраќаат на аеродромот, но сметаат на единиците од САД.

Сепак, на нивниот последен собир над 200 припадници беа изненадени бидејќи војниците кои пристигнаа на аеродромот, всушност, беа припадници на армијата на Република Македонија. Македонските војници пристигнаа на аеродромот како дел од мисијата, според која, тие соработуваат со Националната гарда од Вермонт, на заедничка обука од која потоа ќе бидат испратени единици во Авганистан, истакна мајор Марк Теслер, офицер кој помогна во водењето на групата во име на Бирото на националната гарда во Вашингтон.

Теслер беше единствениот американски војник во авионот што пристигна на аеродромот Пис за 300-тиот лет на групите за пречек, но знаеше дека поздравот значи „здраво“ на македонски, па целата група ги извикуваше зборовите на добредојде додека војниците влегуваа во терминалот.

Понеделникот беше посебен ден за доброволните групи за пречек, бидејќи тие го одбележуваа тристотиот лет со кој или ги пречекуваа војниците од прекуокеанските мисии или ги испраќаа од аеродромот. Групите се собираат на терминалот на аеродромот секогаш кога авион со војници или пристигнува или заминува во мисија, така што нивните доброволци издвојуваат време за да можат војниците да се почувствуваат поддржани и почитувани поради нивната служба.

Водачот на групите за пречек, Ед Џонсон, рече дека групите се собрале за над 100 лета во последните десет месеци, при што доброволците понекогаш се собираат доцна во ноќта или во раните утрински часови за да ги поздрават војниците со песна, ракоплескање, прегратка, освежување, молитва и другарување.

Околу 200 припадници на групите за пречек во понеделникот стоеја во ходникот на терминалот кога Џонсон побара да се подготват за „специјално“ добредојде на американските војници. Неколку моменти подоцна претставници на аеродромот ја информираа групата дека војниците не потекнуваат од САД, туку дека доаѓаат од Република Македонија.

Според вообичаената форма на работа, целата група се погрижи македонските војници да бидат пречекани со големо добредојде, бидејќи ќе бидат на обука со американските сили. Кога македонските војници излегоа од терминалот, наидоа на развеселени лица, ракувања и беа изненадени од херојскиот пречек што го добија во земја во која не престојувале никогаш претходно. Некои од странските војници зборуваа англиски и разговараа со групите за пречек, а потоа им беа предадени подароци. (Фостерс)