„Големиот брат“ влегува без покана

Не ги бараат гледачите „Големиот брат“, „Менувам жена“, „Фарма“ и „Преживување“ - тие им влегуваат дома без прашање

Димитар Чулев

Телевизиски кадар, прв: три личности од женски пол се качуваат врз четвртата (исто жена) и со шест раце и ги тријат градите. Можно е да и' помагаат во мастурбацијата пред милионскиот ТВ-аудиториум на Западен Балкан.

Телевизиски кадар, втор: извесна 36-годишна Ј..., заточеник во куќата на „Големиот брат“, бескрајно долго (во порнофилмовите сцените траат бескрајно долго) го лиже прстот на момокот (аргат со завидливи димензии) од соседниот кревет, а потоа го става меѓу градите и глуми лудило. Пред да стане и да покаже дека е облечена само во – танга.

Телевизиски кадар, трет: заменската тешта на заменската снаа и' вели дека ако на нејзиниот незаменски зет „му текне нешто“, таа ќе земела стап „па по газот“.

Не е прифатлива констатацијата на еден популарен ТВ-водител кој тврди дека „ако не ви се допаѓа ТВ понудата – земете го далечинското“. Без никаква намера да морализираме, реалната шоу-програма што се емитува барем на три телевизии кои се национални концесионери нуди во етер одвратности што се под прагот на издржливост на ТВ-популацијата, а богами и сериозно навлегуваат во сферата за која „надлежни“ за начините за лиферување порнографија треба да интервенираат.

Не ги бараат ТВ-гледачите „Големиот брат“, „Менувам жена“, „Фарма“ и „Преживување“, висококотирани реални серијали кои ТВ-куќите сиромашни по сопствена продукција ги преземаат за да привлечат гледачи. Тие влегуваат во домовите на обичните луѓе секогаш кога кој било ТВ-гледач ќе го земе далечинското да види каква е денес понудата на ТВ-куќите и нивните дистрибутери – кабелските оператори.

И ... во моментот кога се зема в раце семожното далечинско, на ТВ-екранот се појавува една од двете сестри Македонки што учествуваат во балканскиот спектакл „Големиот брат“, која вели: „Ќе се ис...м, ќе се избришам со гаќите и ќе им ги дадам“. Оваа глупава исповед, всушност, е „протест“ на една од станарките во куќата на „Големиот брат“, бидејќи останале, замислете – без тоалетна хартија. Против тоа нема никаква одбрана.

Билјана Николовска од Скопје, мајка на осумгодишна ќерка, вели дека во третото одделение во училиштето каде што учи малата, на одморите си играат „Големиот брат“. Ги копираат „дејанијата“ од екраните што се прилажуваат во време кое не води сметка за тоа која популација и на која возраст може да ги консумира.

Луѓето од наука не се обидуваат да прифатат разговор на тема за дебилните реални шоу-емисии и велат дека не можат да го трошат интелектот и да се повикуваат на две илјади години позитивна научна мисла за да објаснат појава која не само што е девијантна туку има и одредено име - „моронштина“. Еден професор по социјална психологија, на пример, или признат психијатар, треба да објасни каков е тој феномен 15-ина полнолетни личности да прифатат, наводно, заточеништво на неодредено време во еден стан со заедничка (мажи-жени) спална, ве-це, кабина за туширање. А, притоа, знаат дека шансите да останат „во милост“ на „Големиот брат“ е правопропорционална на глупостите што ќе ги направат и тоа не тајно и во „нивниот круг“, туку пред ТВ-камерите што снимаат дали се интересни (горна камера) и кога имаат физиолошки потреби. Мотивот им е наградата од 100.000 евра да го издржат нивниот пат што води кон комплетна декаденција. И нашиот пат кон пеколот наречен телевизија.

„Комерцијалните медиуми произведуваат програма со која нивните сопственици на медиумскиот пазар остваруваат профит. И тука нема ништо спорно. Многу е проблематично кога во таа трка за профит се произведува програма која на Запад се нарекува со вистинскиот збор - ѓубре. Е, сега, тоа што таму го нарекуваат ѓубре кај нас станува комерцијален и друг вид престиж“, велат од Советот за радиодифузија.

„Советот за радиодифузија направи комуниколошка анализа на еден таков телевизиски производ (ТВ-шоуто ’Момент на вистината‘) и оцени дека оваа емисија е далеку под нивото на професионалните, естетските, етичките стандарди во нашето општество. Што е тука проблемот? Кога требаше да се изрече мерка, а имаше предлози дури и да се укине емисијата, констатиравме дека за такво нешто нема прецизна законска основа. Законот не ни помогна дури ниту во поглед на идејата да се помести терминот на емитување во време кога со тоа нема да биде загрозено менталното здравје на малолетната публика“, нагласуваат од Советот за радиодифузија.

Во едно од последните изданија на „Момент на вистината“ (шоу со понормално име од она, на пример, „Ба-ба бум“), еден натпреварувач „признава“ дека иако е женет, имал секс со постари женски личности, дека тие го привлекувале и, како да раскажува стар изветвен виц, јавно соопштува дека „повеќе ја сака мама од сопругата“.

Шоуто на „Џери Спрингер“ е жива наива споредено со вулгарната намера на креаторите на споменатите „шоуа“ да ги предизвикаат најниските страсти и емоции на потенцијалните гледачи. Но, дали се потенцијални? Податокот дека една емисијата се пренесува во Србија, Босна, Црна Гора и во Македонија и каде што илјадници (12-13 милиони потенцијална ТВ-популација) секојдневно испраќаат СМС за да гласаат за својот фаворит носи сериозна заработувачка. Тоа е едната димензија.

Втората е очигледната намера да се изнуди уривање на сите важечки морални норми, велат експерти за „Утрински“, и давање легитимитет на неморалот и на одредени функции на човековото тело кои искуството на три илјади години цивилизација ги определија како исклучиво интимни. Како одеднаш заедничките машко-женски простории станаа интересни, па дури и тоалетите (и тоа што се случува таму?!) е веројатно прашање за кое треба да се заинтересираат оние што се занимаваат со социјалните девијации.

И, уште нешто. Жално е што она што денес преку ТВ-медиумите се продава како нова инвентивност и „бренд“ е само подгреана манџа од оригинални идеи над кои цивилизацијата како таква се замислувала во минатите милениуми. Нема ништо ново во демонстрирањето декаденција – Римјаните пред распадот на империјата го доведоа до совршенство јадењето, повраќањето, групниот секс и убиствата од страст. Грчките филозофи ја кренаа педерастијата на ниво на вистинска љубов, особено на киниците (Диоген) кои јавно прашуваа зошто не се сити кога ќе си го истријат желудникот, како што се сексуално задоволни откако ќе мастурбираат...

Џорџ Орвел, условно речено, се превртува в гроб што неговата идеја за „Големиот брат“, кој го контролира општеството во еден утописки иден свет сместен во делото „1984“, каде што личноста и индивидуалниот живот не смет да значат ништо, сега се користи како наслов за нискобуџетен серијал.

Идејата за посматрање на колективното живеење е обработена во култниот филм „Sliver” со Шероун Стоун, каде што главната личност (Стоун) најмува апартман во една вискокатница која е под постојан видеонадзор на сопственикот (Вилијем Болдвин). Филмот, настрана крими-ефектите, засега во проблемот на воајеризмот, кој ако некогаш бил својствен за типови по паркинзи, сега благодарение на аудиовизуелната техника е достапна за секого. Со претворањето на ТВ-аудиториумот во колектива воајерска популација, и границите на невозможното се поместуваат.

Конечно, да го споменеме и „Господарот на мувите“, екранизиран роман на нобеловецот Вилијам Голдинг, книшка за група деца (британски кадети) кои по авионска несреќа наоѓаат спас на пуст остров. Голдинг, преку описот на нивниот обид за самоорганизирање, загатнува во најдлабоките тајни на човековата природа, која неконтролирана од општествените норми е склона да се врати кон првобитната состојба: сила, убиства, контролирани само од стравот од непознатото (замена за религија).

„Без родители, без наставници, без правила – без милост“ е слоган на изгубените на островот (модерна верзија гледаме во реалниот ремикс под име „Опстанок“).

Дали е тоа целта на реалните шоуа? И дали следен ТВ-ексклузив ќе биде реално убиство снимано во живо. Како во времето на гладијаторските игри. А, ТВ-аудиториумот ќе испраќа апликации со „прст нагоре“ или „прст надолу“ за својот фаворит преку СМС-пораки? Во Бразил неодамна беше уапсен ТВ-водител кој нарачувал убиства во име на поголема гледаност...