5 прашања 5 одговори

Ајде сите сами на избори

Марјан Додовски, претседател на ВМРО-НП

Александра М. Митевска


Дали ВМРО-НП останува на определбата за самостоен изборен настап, со оглед на најавите за обединување на десничарскиот камп контра ВМРО-ДПМНЕ?

ВМРО-Народна партија е единствената политичка партија во македонскиот политички блок што досега секогаш настапувала сама на избори. Настапот сме го темелеле врз изворните принципи на ВМРО и секогаш со реална економска и социјална програма. Пораката што се испраќаше до македонскиот граѓанин секогаш беше авангардна со јасни пораки за стабилна и просперитетна иднина за македонскиот граѓанин и за македонската држава. Од таа гледна точка на сите партии им упативме порака сите да излезат на избори сами за да знаат граѓаните за која програма и политика реално да се определат, без затскривање зад големи и обемни коалиции, кои претставуваат параван за најразлични манипулации и создавање нереални и безлични политички фигуретки на македонската политичка сцена.



На каков изборен резултат и на каква позиција по изборите се надевате?

По следните парламентарни избори една работа ќе биде сосема јасна, а тоа е дека без ВМРО-НП нема да може да се формира следната македонска влада. Тоа би значело дека во следниот македонски парламент ВМРО-НП ќе биде гарант на демократијата и фактор за зачувување на демократските вредности во нашата држава. Кога би говореле низ бројки, тоа би значело дека очекуваме да ја добиеме поддршката на минимум една третина од стандардното вмровско гласачко тело, кое вкупно брои околу 300 илјади гласачи, а, секако, значаен е и моментот на пристапување на поддржувачи и членови што досега воопшто не биле партиски и политички активни. Значи, кога денес би се одржале парламентарните избори, очекуваме во македонскиот парламент да бидеме присутни со 12 до 15 пратеници.



Вашата партија пред извесно време го стави во функција Републичкиот изборен штаб. Не мислите ли дека малку избрзавте, бидејќи се чини извесно дека изборите ќе бидат во редовниот термин?

Одлуката да се формира Републички изборен штаб се покажа како целосно исправен потег во концептот на нашето партиско функционирање. Ние сме единствената политичка партија што на 23 октомври -Денот на ВМРО, излезе со политичка порака до граѓаните на Македонија. Истакнавме дека е дојдено времето за повторни промени, со што би се вратило достоинството, надежта и иднината кај македонскиот граѓанин. Човекот е во центарот на вниманието со почитување на христијанските вредности и со порака за благосостојба за сите.

Републичкиот изборен штаб претставува и тело што темелно се конституира и прецизно се подготвува за избори - независно какви ќе бидат, дали предвремени или редовни. Во таа насока се одвиваат и теренските активности преку консолидирање на целокупната партиска инфраструктура. ВМРО-Народна заедно со СДСМ и ВМРО-ДПМНЕ се единствените политички партии што имаат партиска инфраструктура на целата територија на Македонија.



Како ги коментирате тврдењата во јавноста дека соработувате со владејачката ВМРО-ДПМНЕ и дека поради тоа не се конфронтирате толку жестоко меѓу себе?

Многупати досега сме истакнале дека како партија функционираме како дупла опозиција - и на СДСМ и на ВМРО-ДПМНЕ. Тоа што нашата партија има засилен раст и се' поголема поддршка кај македонските граѓани претставува сигнал за политичките противници повторно да започнат да се занимаваат со најразлични конструкции, шпекулации и манипулации. Сме издржале многу. Знаеме колкава е нашата сила и имаме јасен концепт за организирање и функционирање. Досега многупати сме биле предмет на најразлични конструкции и манипулации, па во таква насока ја гледаме и оваа последнава.



Ќе имаат ли избирачите можност да го видат Љупчо Георгиевски како кандидат за пратеник во кампањата за престојните парламентарни избори?

Да. Едно е сигурно, нашиот почесен претседател, а воедно и досега најуспешниот македонски премиер, најдиректно ќе биде вклучен во целиот изборен процес. Георгиевски на следните парламентарни избори ќе биде носител на листа во една од Изборните единици со директен ангажман во водењето на кампањата.