Грција бара објаснување од Боливија

Атина е уверена дека со сите признавања Македонија нема двотретинска поддршка за меѓународното име,
туку само за билатерала

Од нашиот дописник
Миркица Поповиќ

Атина - Признавањето на уставното име од Боливија, Зимбабве и од Сирија грчките аналитичари го сметаат за обид на македонската Влада да собере сојузници и да поднесе барање за признавање на уставното име во Генералното собрание на Обединетите нации. Грчкиот весник „Катимерини“ коментира дека македонската Влада зад завесата сериозно игра со идејата дека доколку се стави на гласање на Генералното собрание на ОН, предлогот за признавање на уставното име би можел да има позитивен исход, бидејќи две третини од членките го имаат признато тоа.

Дипломатски извори за „Катимерини“ оценуваат дека моментално нема индикации дека Македонија би се решила на таков потег во скоро време, но доколку дојде до тоа, ќе биде субверзија на преговарачкиот процес во ОН. Новинарите и аналитичарите што се занимаваат со македонското и генерално со балканските прашања во Грција, исто така, сметаат дека се мали шансите вакво барање од страна на македонската Влада да дојде пред Генералното собрание на ОН, а и да дојде, прашање е колку од државите што не' имаат признато би гласале позитивно за него. „Официјална Атина има потврда од голем број важни држави дека потпишувањето на договорот за признавање на уставното име на ФИРОМ се однесува само на билатералните односи, а не и на ставот што ќе го имаат во меѓународните организации за прашањето за името“, пишува „Катимерини“. Генералното мислење е дека речиси да нема шанси големите сили да ја остават Грција на цедило во ваков случај и дека пријателите што ги одбира македонската Влада за признавање на уставното име и за собирање сојузници во ОН не се доволно влијателни за да се издејствува толку важна одлука во Светската организација.

Како што пренесува весникот, признавањето на уставното име од Зимбабве не ја шокирало грчката страна, бидејќи, и покрај обидот тоа да остане тајна, за официјална Атина не поминала незабележано средбата меѓу Никола Груевски и претседателот на Зимбабве во Триполи. Грчкото Министерство за надворешни работи веќе побарало објаснување и известување од Зимбабве и од Боливија за содржината на договорот за признавање на името и ги очекува нивните официјални одговори. Слична реакција имаше грчкото МНР и по признавањето од Сирија, но и покрај инсистирањето од страна на грчките медиуми, не беше кажано каков бил одговорот од официјален Дамаск.

Одлуките на Боливија и на Зимбабве, но и интервјуто на македонскиот премиер за МИА што го пренесоа голем дел од грчките медиуми, во Грција ги толкуваат како уште еден индикатор дека нема поместување во ставовите на македонската Влада и премиерот Груевски во спорот и преговорите за името. Ваквото раздвижување и испраќање измешани сигнали за волјата за решавање на спорот за името тука се проценуваат како спротивни на конструктивноста што се очекува од македонска страна пред важните моменти во февруари, односно средбата во Њујорк на преговарачите со медијаторот Метју Нимиц и посетата на шефицата на американската дипломатија Хилари Клинтон на Атина.