Ни силното сонце ни не помалку силната конкуренција не го спречија Алекс Шварцер од Италија да отиде најдалеку во кариерата со освојувањето на златниот медал во брзо одење на 50 км на Олимписките игри во Пекинг. Осум километри до целта дебитантот на ОИ реши да се одвои од групата и со надмоќен финиш пропешачи до нов олимписки рекорд, подобар за цели 80 секунди од тој на Вјачеслав Иваненко од Сеул 1988. Тој им ја донесе првата олимписка титула на Италијанците во најдолгата атлетска дисциплина по цели 44 години, а колку беше убедлив во завршницата зборува предноста од 2,18 мин. во однос на „сребрениот“ Австралиец Џаред Талент и 3,05 мин. во споредба со „бронзениот“ светски рекордер Денис Нижегородов од Русија.
Швацер е носител и на две бронзи на 50 км од двете последни светски првенства во Хелсинки 2007 и во Осака 2005. Тренер му е гуруто на италијанското брзо одење, Сандро Дамилано, чии штитеници донеле 40 медали од големите натпреварувања, меѓу кои и братот на Алекс, Маурицио Швацер, кој има злато во брзо одење на 20 км од ОИ 1980 во Москва и од мундијалите во Токио 1991 и во Рим 1997.
Покрај во атлетика, се има испробано и во хокеј на мраз, спорт во кој играл и за селекцијата на Италија до 16 години. (Р.Д.)
