Кавадарци ги празнува деновите на грозјето и на виното

„Тиквешкиот гроздобер“ почна во 1964 година, а последнава деценија манифестацијата се одржува во континуитет

КАВАДАРЦИ - Проблемите на лозарите со пласманот и цените на родот не се пречка за празнување во Кавадарци. За традиционалната културно-туристичка манифестација „Тиквешки гроздобер 2010“, која ќе се одржи викендов, се најавуваат многу новини и атрактивни содржини. На гроздоберот кралот и кралицата симболично ќе го откинат првиот грозд со што треба да се означи стартот на бербата.

Од локалната самоуправа Кавадарци, организатори на „Тиквешкиот гроздобер“, велат дека градот живее со проб��емите на лозарите, но дека и годинава ќе се одбележуваат деновите на грозјето и на виното.

Во рамките на програмата денес ќе се одржи авторели трка „Витачево 2010“, а ќе се промовира монографијата „Докторите и фармацевтите од Кавадарци од 1878 до 2008“ од д-р Милан Петров.

Централен настан е карневалот на Градскиот плоштад, а модератор и шоумен ќе биде Игор Џамбазов. Пред кавадарчани и гостите на гроздоберот концерти ќе одржат Дани и „Парти брејкерс“.

В недела е трката со магариња, турнирот во играње табла, ќе се дегустира вино и ќе се доделат дипломи од Винската академија. Џезерите од Кавадарци ќе одржат џез-концерт, ќе има жонглери, а предвиден е настап на културно-уметничко друштво од Горни Милановац, Србија.

„Тиквешкиот гроздобер“ почна во 1964 година, а последнава деценија манифестацијата се одржува во континуитет.

Вчера се одржа детскиот карневал на кој најмладите под маски ги покажаа своите замисли и беа дел од гроздоберот. (А.Д.)