Два учебника ќе бидат повлечени од употреба

Најмалку два учебника ќе бидат повлечени од употреба, а кои се тие, ќе се знае деновиве. Министерот за образование и наука, Никола Тодоров, најави дека на посебна прес-конференција ќе објави кои учебници ќе бидат повлечени од употреба поради посериозни грешки што ги детектирале експертските тимови, а кои ги ангажираше Министерството. Тимовите испратиле извештаи до министерот за повлекување на дел од учебниците.

„Во извештаите е предложено некои учебници да бидат повлечени. Некаде се предлагаат само мали корекции, а дадени се и препораки, со циркуларно писмо да се известат училиштата дека во одреден дел во некои учебници постои грешка. Идната недела ќе излеземе со целосна, детална информација за сите учебници, изјави вчера министерот Тодоров за медиумите. Тој додаде дека експертите пронашле сериозни, суштински грешки во учебниците што ќе бидат повлечени, чија содржина не одговарала на возраста на учениците. Во други учебници имало граматички грешки или грешки во содржината.

Претседателот на Националната комисија за учебници, Зоран Радиќ, вчера криеше дека добиле какви било извештаи од експертите за учебниците. Тој најави дека конечните извештаи ќе ги чека до крајот на неделава. Радиќ тврдеше дека во учебниците се пронајдени само мали грешки, но не толкави за тие да бидат повлечени. Тој посочи дека е завршена ревизијата за учебниците од прво до петто одделение.

„Ме известија дека се забележани помали грешки во учебникот по македонски јазик за прво одделение. На пример, наместо слики, во учебникот има повеќе текст“, ни изјави Радиќ, но рече дека, сепак, ќе треба да се чека на официјалниот став од тимовите за да се знае точно за какви грешки станува збор.

Досега е завршена ревизијата на вкупно стотина учебници од прво до петто одделение. А, што се однесува до ревизијата на учебниците од петто до осмо одделение, таа ќе доцни поради тоа што се' уште не се формирани тимовите за дел од учебниците. Според Радиќ, на учебниците за погорните одделенија се работи, но за дел од нив не се добиени известувања од факултетите кои професори ќе бидат предложени да бидат делови од тимовите што ќе ги скенираат учебниците.

Министерството за образование и наука е на став дека доколку се забележат помали грешки, само ќе се препечатат спорните страници или, пак, забележените грешки ќе се посочат во самиот учебник.

Министерот Никола Тодоров најави дека ревизијата на учебниците ќе трае до почетокот на октомври, но, сепак, таа се одолжи поради бавното формирање на комисиите. Неизвесно е и што ќе се прави откако ќе се утврдат грешки во учебниците поради тоа што се ближи крајот на првото полугодие. Во меѓувреме, учениците учат од учебници чиј квалитет е под лупа на

експертите. (Ж.Х.З.)