Претходен број

Проблемот со Грција не е изговор за европски неуспех

Симон Илиевски

ОХРИД – „Реториката на премиерот Груевски се совпаѓа со онаа што во последно време имавме можност да ја слушаме и од него и од министерот Милошоски. Со неа се подготвува македонската јавност за правдање на неуспехот оваа есен околу претпристапните преговори со ЕУ, при што се наведува дека единствена причина е спорот за името со Грција. Ставот на Грција е проблем и може да ни попречи во евроинтегрирањето, како што беше случајот во Букурешт, меѓутоа тоа не е единствената причина. Претходно треба да ги исполниме сите услови и прогрес зашто имаме се' уште многу незавршена работа. Се надевам дека ќе се искористи овој период не да се бара алиби за неуспехот, туку да се фокусираме кон обврските, а не да објаснуваме зошто не сме успеале“, изјави вчера во Охрид претседателот Бранко Црвенковски.

Одговарајќи на новинарско прашање за повикувањето на премиерот Груевски на единство на прославата на Денот на независноста, Црвенковски рече дека неоспорно е повикувањето на единство на народот и државата и дека нема дилеми освен што останува отворено прашањето околу тезите и политиките што треба да се постигнат. „Ако се мисли дека единство може да се постигне само со поддршка на нечии ставови, тогаш се плашам дека тоа не е искрено повикување за збивање на редовите, туку обид да се наметне својата вистина како единствена “, смета Црвенковски. Тој призна дека има разлики меѓу него и премиерот за овие отворени прашања. Црвенковски рече дека во овој период Груевски се обидува да ги бара виновниците зошто Македонија би доживеала неуспех, а тој се обидувал да му каже дека наместо тоа во овој период треба да се стори се' да се забрзаат евроинтеграциите.

„На средбата што ја имавме во вторникот немаше потреба од усогласување зашто немаше нови предлози пред одењето на Димитров во Њујорк. Не сум сигурен, но е можно на средбата во Њујорк закажана за в четврток медијаторот Нимиц на претставниците на двете земји да им изложи конкретен предлог. Во тој случај ќе треба да го анализираме и да изградиме заеднички став“, рече претседателот Црвенковски. Тој додаде дека во целата работа сите треба да бидат реалисти и да се поддржи она што е најдобро за народот и за државата.

Како што стојат сега работите, решавањето на прашањето со името се' уште е со медијаторството на Нимиц, но според Црвенковски во иднина би биле можни и други начини доколку се измени сега важечката Резолуција на ОН.

Деновиве е актуелно прашањето и околу условувањето на обележувањето на границата со признавањето на независноста на Косово. Претседателот Црвенковски смета дека легитимно право на Македонија е да ги штити своите државни и национални интереси, а Косово има свои, меѓу кои најважно е признавањето од поголем број земји, особено од соседите. „Наш интерес е границат�� да се обележи што е можно побрзо и пообјективно без какви било отстапувања, а Косово да го признава и уважува нашето уставно име“, рече Црвенковски.