Претходен број

ЕУ-аспирациите ја одржуваат Македонија како целина

„Патот кон Европа е нешто ја одржува Македонија како целина“, изјави Тео Вајгел, советник на македонската Влада во интервју за „Дојче веле“. „Во сите овие години, во кои одвреме-навреме престојувам во Македонија, откривам постојано дека европската аспирација е врската што ја држи земјата заедно. Таму и етничките групи знаат дека и' припаѓаат на Европа и дека сакаат еден ден да и' припаѓаат на ЕУ“, вели Вајгел, додавајќи дека Македонија мора да ги надмине разочарувањето и лутината од грчкото вето на самитот на НАТО во Букурешт.

Сепак, советникот на македонската Влада додава дека не може да ја разбере Грција. „Ја сакам Грција, но, сепак, не го разбирам одбивниот став кон Македонија поради името. Сите други членки на НАТО ќе го поздравеа пристапувањето на Македонија и се надевам дека во скоро време, сепак, ќе најдеме некоја можност и да го реализираме тоа. Но, тоа е задача на двете влади и на билатералните разговори“, смета Вајгел. „Во таквите прашања на престиж мора еднаш да се спушти топката и да се најде реално решение. Се надевам дека двете соседни земји ќе ги научат лекциите од минатото на европскиот континент и дека ќе ги надминат меѓусебните проблеми, како што се случи тоа и меѓу другите европски земји“, вели Вајгел. (Макфакс)