Адеми бара правична застапеност на универзитетите

„Сите државни институции имаат обврска да ја почитуваат правичната застапеност како уставна одредба, па и универзитетите“, изјави вчера вицепремиерот за спроведување на Рамковниот договор, Абдулаќим Адеми. Сепак, тој негираше дека до универзитетскиот кадар било испратено барање да се изјасни за својата етничка припадност.

Адеми, одговарајќи на прашањето дали е поважна правичната застапеност од квалитетот на универзитетите, одговори дека „пред се', ние, како граѓани на Македонија, како Албанци, сметаме дека квалитетот е побитен“. „И покрај правичната застапеност, треба да се следи и квалитетот“, вели Адеми, додавајќи дека токму поради тоа е усвоена стратегија за интегриран образовен систем, со цел сите ученици и студенти да имаат ист пристап и услови за учење на целата територија.

Вицепремиерот на прашањата одговараше во присуство на евроамбасадорот Ерван Фуере, кој одговори дека нема информации за барање за правична застапеност до универзитетите. Притоа, тој подвлече дека приоритетот што е поставен за реформите на јавната администрација е многу јасен и важно е именувањето на луѓето да се прави според професионалните експертизи. Адеми и Фуере вчера во Владата разговараа за извештајот на ЕК за Македонија и за имплементацијата на Рамковниот договор. Коментарот на Адеми беше дека државните институции, т.е. Македонија сами си го напишале извештајот, а тој само бил печатен од ЕК. (T.Г.)