Поглед

Мангупи на лизинг

Соња Маџовска

Мангупи со кола на лизинг, но со рок на траење од само неколку месеци. По истекот на рокот на неплаќање, колата завршува на паркингот на некоја од лизинг-компаниите. Вака накусо може да се опише шансата што ја бараат младите во последно време за да фатат женска и да се покажат пред другарите. Дали мисијата е успешна?

За момчињата, ако ја фатиле посакуваната девојка има некоја сатисфакција, но прашање е дали успеале да ја задржат и по одземањето на автомобилот, или и рокот на мангуплакот истекол.

Но, она што е сигурно е дека оваа мисија во никој случај не им оди на рака на лизинг-компаниите. Сепак, и тие понесуваат вина и одговорност за ситуацијата во која се нашле. Во трката за поголем колач на пазарот, очигледно е дека даваат коли и на „жими мајка“. Ова го признаваат и од самите лизинг-компании, кои велат дека овој проблем особено се раширил откако почнале да даваат возила без учество или со ниски учества, со кои подоцна не успеваат ни оддалеку да ја покријат амортизираноста на овие возила.

Според одредени информации, некои лизинг-компании моментно имаат на лагер и по 100 вакви возила. Чаршиски муабети, пак, велат дека не станува збор за бесни и скапи коли, туку за оние помалите до 10.000 евра. Иако тие може да се запленети и по само неколку месеци возење, цената им е падната, ама бадијала, пак никој не ги купувал.

Одземените или вратените возила немаат атрактивни цени. Ем се сметаат за стари ем цената им е висока, оти компанијата мора да покрие одредени трошоци. Објаснувањето на новите купувачи најчесто било дека кога веќе купуваат нова кола, сакаат да биде баш нова, а ако се решат за возена, тогаш имаат поголем избор.