Иванов: Со ерга омнес не се решава спорот

Атина - Грчкиот предлог за име за севкупна употреба ерга омнес не е реална основа за решавање на грчко-македонскиот спор за името, оценува македонскиот претседател Ѓорге Иванов во интервјуто за грчкиот Институт ЕЛИАМЕП, објавен денеска на веб-страницата на оваа невладина и непрофитна истражувачка организација.

„Ерга омнес решение, она што е предложено од страна на Грција, не е реално како основа за решение. Прво, тоа апсолутно се коси со сите меѓународни начела за регулирање на односите меѓу државите, и второ, не е прифатливо во случај кога две третини (129) од земјите-членки на ОН ја имаат признато Република Македонија под уставното име“, вели Иванов.

Според него, правото на избор на име е право што е фундаментално заштитетно од современиот корпус човекови права. 

„Се прашувам како некој може дури и да помисли да избере или да предложи име за други луѓе или менување Устав на некоја друга земја за прашања поврзани со идентитетот, кои се фундаментално заштитени од страна на современиот корпус на човекови права. Затоа бараме фер решение што ќе го заштити достоинството на двете држави и нивните народи“, смета Иванов.

Грција, истакнува шефот на македонската држава, нема направено отстапки во спорот за името, туку ја прифати идејата за сложено име со терминот Македонија како единствена опција.  

Нашето чувство дека грчката страна постојано ги радикализира своите позиции, со цел да го одложи решавањето на спорот околу името, нагласува претседателот. Иванов, сепак, посочува дека решението за ова прашање не смее да влијае врз македонскиот национален и етнички идентитет и македонскиот јазик.

„Оттука, географски одредници, како што имаме и претходно истакнато, изгледаат инкопатибилно со овој основен принцип, бидејќи недвосмислено можат да навлезат во нашиот идентитет“, истакнува претседателот Ѓорге Иванов во интервјуто за ЕЛИАМЕП. (МИА)