Македонско-турско здружение „Мустафа Кемал Ататурк“ - Битола, Шенол Мемиш, претседател
Згрозени од обвинувањата дека една политичка партија формирала невладини организации, со цел агитирање во насока на соборување од власт на друга политичка партија, Македонско-турското здружение „Мустафа Кемал Ататурк“ -Битола, организација, која е една од основачите на Платформата за борба против сиромаштијата и член на Сојузот на турски невладини организации во Република Македонија, МАСТУСИТЕБ, преку медиумите апелираме до сите политички партии: „Тргнете ги рацете од НВО-секторот и не злоупотребувајте ги невладините организации!“
На овој начин само се урива рејтингот на НВО-секторот во Република Македонија, а пред се', довербата кај странските и кај домашните фондации, кои ги помагаат проектите и активностите што ги реализираме ние, здруженијата на граѓани, легално функционираме и сме регистрирани во согласност со законите и Уставот на Република Македонија и не припаѓаме ниту на едната ниту на другата страна.
Сите ние, како граѓани, имаме право да членуваме и во здруженија на граѓани и во политички партии, но во никој случај не смееме да дозволиме здруженијата да станат продолжена рака на политичките партии.
Искрено се надеваме дека ќе мотивираме и други здруженија да реагираат за се' почестите злоупотреби на НВО-секторот во политички цели, затоа што во демократските држави борбата за власт се води во Собранието и на редовни или вонредни избори, а не со формирање фиктивни здруженија со строго определени задачи, спремни да го обработат највалканиот дел, и тоа не за малку пари.
