Забрането ни е да се информираме од опозициските медиуми!

Авторот и е познат на редакцијата

Сакам да информирам дека нас, државните службеници, ни е ускратено правото на информирање во една од поголемите институции на државата, со информации од „Утрински весник“ и од сите останати пишани медиуми во Македонија, освен „Нова Македонија“’. Исто така, ускратено ни е информирањето преку веб-страниците на сите ТВ-медиуми во Македонија, освен Сител ТВ!

Значи, разбирам да се укинат социјалните мрежи, така и треба, да се укинат страни за слушање и симнување музика, филмови... но да се укине пристап до информирање за настаните во сопствената држава, мислам дека апсолутно станува збор не за автократија, туку за тиранија во едно општество. И да речеме дека и тоа одзема голем дел од работното време на државните службеници, па доаѓа до последици на неизвршување на работните обврски, па укинувањето и неможноста да се посетува кој било и каков било медиум треба да се забрани генерално, а не парцијално, по потреба во зависност од наклонетоста кон Владата или не.

Алармирам како граѓанин, не како државен службеник, дека ова се првите чекори кон веќе поминатото едноумие, а наредно може да следи, казнена инстанца, некој современ Голи оток. Ве молам името да и' остане познато на Редакцијата, бидејќи во вакви услови на спроведување фашистички режим, моето право на слобода на говор може да заврши со отказ од работното место.