Претходен број

Нимиц ќе предложи ново решение за името

Тоа би било модификација на претходниот предлог на медијаторот

Тамара Грнчароска


Нов работен документ со решение за спорот со името се очекува да им биде доставен на македонската и на грчката страна во спорот со името на средбата со медијаторот Метју Нимиц на 11 септември во Њујорк. Ова го потврдуваат високи политички кругови во земјава кои новиот документ од Нимиц го именуваат не како предлог, туку како работен документ што би бил модификација на претходниот, откако тој ги испита позициите на двете страни пред дваесетина дена.

„Имам чиста претстава што можат да прифатат, а што не можат да прифатат“, изјави Нимиц при последната посета на регионот.

Претходниот нацрт-предлог на Нимиц содржеше две формулации за име со географска определница, најчесто споменувани беа „северна“ и „горна“, кое би влегло во Уставот и би се користело и во билатерална и во мултилатерална комуникација на земјава, а се оспоруваше и користењето на историјата од античкиот период.

Во пресрет на средбата во Њујорк и ново предлог-решение за спорот, за вчера беше најавена координативна средба меѓу претседателот и премиерот на државава, Бранко Црвенковски и Никола Груевски. Како што тврдат доброупатени извори, тешко дека од средбата ќе се излезе со усогласен став и позиција за името, пред се', поради дијаметрално спротивните ставови на Црвенковски и на Груевски, кои изминативе две недели повторно влегоа во судир околу ова прашање. Црвенковски со ставот за компромис, со одредени отстапки од македонска страна кои не би го загрозувале националниот идентитет на државата и нацијата, влезе во директен конфликт со Груевски, кој повторно ја врати во игра двојната формула како решение.

Груевски својот став околу решавањето на спорот со името го повтори еден ден порано, на прославата на Денот на независноста - 8 Септември, најавувајќи „период на интензивирање на разговорите, но и период на разни дезинформации, пропаганда, дел поради внатрешни, но најмногу поради надворешни фактори и причини“. Обвинувајќи ја Грција дека не сака да се постигне договор и сака промена на името за целосна меѓународна употреба и „цел свет да не' вика по име кое Грција ќе ни го одбере“, Груевски повтори дека тој нема намера да прифати такви уцени.

Изјавите на Груевски за евроатлантските интеграции на земјава доаѓаат нецел месец пред заклучувањето на извештајот на Европската комисија за напредокот на Македонија и исполнувањето на осумте препораки за добивање датум за старт на преговорите. Извештајот, кој треба да биде презентиран во ноември, ќе биде документ врз кој ќе се раководи Советот на министри на ЕУ на крајот од годината во носење на одлуката за Македонија.

Добр��упатени извори во земјава се на став дека Македонија засега нема добри шанси да добие препорака за датум на преговори од Комисијата, но не толку поради спорот со името туку поради неисполнетите обврски, како што се политичкиот дијалог, лошо спроведените избори, бавните реформи во судството и во полицијата.

Тие го аргументираат тоа со последната изјава на еврокомесарот на ЕУ за проширување, Оли Рен, кој минатата недела и' порача на Македонија дека „исполнувањето на Копенхашките критериуми е основен услов за евроинтеграцијата, па затоа ја повикувам Владата да осигура соодветно функционирање на демократските институции и засилен политички дијалог“. Од осумте услови на ЕУ за Македонија, со послаби резултати Рен ги посочи судските реформи, борбата против корупцијата, политичката стабилност и слободните и фер избори.

Иако политичкото влијание на спорот не е исклучено, според нив, Грција нема потреба да го користи спорот со името, бидејќи ние самите не си ја завршивме работата. Сепак, Грција и да сака да не' блокира, Европската комисија не работи според принципот на консензус, што значи дека грчкото „не“ не би имало никакво влијание врз извештајот на Комисијата за евентуален датум за земјава и позитивен извештај за спроведените реформи, туку тоа е можно само за време на седниците на Европскиот совет кога се состануваат лидерите на земјите-членки. (Т.Г.)